واشنگٹن: امریکی وفاقی تحقیقاتی ادارے (ایف بی آئی) نے کہا ہے کہ اورلینڈو فائرنگ کے واقعے میں حملہ آور کے کسی بھی دہشت گرد تنظیم سے رابطوں کے شواہد نہیں ملے، ممکن ہے یہ قدم حملہ آور نے شہرت پانے کے لیے اٹھایا ہو۔
امریکی صدر باراک اوباما کو دی گئی بریفنگ میں فیڈرل بیورو آف انویسٹی گیشن کے ڈائریکٹر نے بتایا کہ واقعہ دہشت گردی ہے یا نہیں اس حوالے سے تحقیقات جاری ہیں تاہم اب تک کی تحقیقات میں حملہ آور کے کسی دہشت گرد تنظیم سے روابط کے ثبوت نہیں ملے۔
خبر رساں ادارے کے مطابق ڈائریکٹر ایف بی آئی نے مزید بتایا کہ حملے کی منصوبہ بندی کسی اور ملک میں ہونے کے بھی شواہد نہیں ملے تاہم اس حوالے سے تحقیقات جاری ہیں۔
واضح رہے کہ امریکی شہر اورلینڈو میں اتوار کو ہم جنس پرستوں کے نائٹ کلب میں فائرنگ کے واقعہ میں 50 افراد ہلاک اور 53 زخمی ہوگئے تھے،امریکی صدر باراک اوبامہ سمیت دنیا بھر کے رہنماؤں نے واقعہ پر اظہار مذمت کیا ہے۔
