اسلام آباد: وزیرِدفاع خواجہ آصف کا کہنا ہے کہ پاکستان جوابی کارروائی کی بھرپورصلاحیت رکھتا ہے، بھارت ذمہ داری کا مظاہرہ کرے۔
لائن آف کنٹرول اورورکنگ باؤنڈری پر بھارت کی بلااشتعال فائرنگ سے متعلق بیان میں وزیرِ دفاع خواجہ آصف نے کہا ہے کہ پاکستان بھارتی جارحیت کا جواب دینے کی بھرپورصلاحیت رکھتا ہے لیکن سرحدی کشیدگی کو تصادم میں تبدیل نہیں کرنا چاہتے، بھارت کو احتیاط اورذمہ داری کا مظاہرہ کرنا چاہئیے۔
امورِ خارجہ کے مشیر سرتاج عزیزنے بھارتی رہنماؤں کے سخت بیانات کے جواب میں کہا کہ بھارت نے بلااشتعال فائرنگ کا سلسلہ شروع کررکھا ہے۔ پاکستان امن چاہتا ہے اور بھارت کے لئے یہ بات سمجھنا ضروری ہے۔
دوسری جانب بھارتی رہنماؤں کی جانب سے پاکستان کے خلاف زہر اگلنے کا سلسلہ جاری ہے۔ بھارتی وزیرِ داخلہ راج ناتھ سنگھ کا کہنا تھا کہ بھارتی فورسز پاکستان کومنہ توڑ جواب دینے کے لئے تیار ہیں۔
