اسلام آباد: وزیراعظم نواز شریف کا کہنا ہے کہ پاکستان کو مشکلات سے نکالنے کے لئے قوم نے مینڈیٹ دیا،پاکستان میں اب منفی سیاست کی کوئی گنجائش نہیں، کسی کو اسی اور نوے کی سیاست کی اجازت نہیں دے سکتے۔
اسلام آباد میں بہترین ٹیکس دہندگان میں اعزازی کارڈ کی تقسیم کی تقریب سے خطاب کرتے ہوئے وزیراعظم نواز شریف نے کہا کہ راتوں رات تبدیلی نہیں آتی، مسلسل محنت کی ضرورت ہوتی ہے، پاکستان میں اب منفی سیاست کی کوئی گنجائش نہیں، ہم نے کسی حکومت کا تختہ الٹنے کے لئے کوئی کام نہیں کیا۔
وزیراعظم نواز شریف کا کہنا تھا کہ بجلی کامسئلہ پرانا ہے، اپنے دور میں حل کرنے کی کوشش کرینگے، بجلی کے متعدد منصوبوں پر تیزی سے کام جاری ہے، موجودہ عمل میں کسی کو رکاوٹ ڈالنے کی اجازت نہیں دے سکتے۔
وزیراعظم نے مزید کہا کہ زرمبادلہ کے ذخائر چودہ ارب ڈالرز تک پہنچ گئے ہیں اور مالیاتی خسارہ بھی کم ہوکرچار فی صد ہوگیا۔
