کراچی: ایم کیو ایم کی رہنما خوش بخت شجاعت نے پی ٹی آئی کی جانب سے بیانات کے خلاف کل احتجاجی مظاہرے کا اعلان کیا ہے ، جس میں سول سوسائٹی اور اہلیانِ کراچی بھی شریک ہوں گے۔
کراچی میں پریس کانفرنس کرتے ہوئے متحدہ قومی مومنٹ کی رہنما خوش بخت شجاعت نے پی ٹی آئی کے رہنماوں کے بیانات کے خلاف ہفتہ کی سہ پہر 3 بجے تین تلوار چورنگی پر سول سوسائٹی کی جانب سے مظاہرےکا اعلان کردیا۔
خوش بخت شجاعت کا کہنا تھا صوبہ سندھ میں نئے انتظامی یونٹس کے قیام کی مخالفت کرنا انتہائی قابل مذمت ہے ان کا کہنا تھا ہم قومیت کی بنیاد پر نہیں انتظامی بنیادوں پر نئے یونٹس کی بات کررہےہیں، اگر پاکستان میں صوبے بن سکتے ہیں تو سندھ میں کیوں نہیں بن سکتے ہیں۔
انہوں نے کہا کہ تحریک انصاف کے رہنماوٴں کے اشتعال انگیزبیانات سے سندھ کے شہری علاقوں کے عوام کے جذبات بری طرح مجروح ہوئے ہیں اور وہ ان اشتعال انگیز بیانات پر شدید احتجاج کا حق رکھتے ہیں۔
اس سے قبل متحدہ قومی مومنٹ کے ارکانِ اسمبلی نے پی ٹی آئی رہنماؤں کےبیان پر پارلیمنٹ کےمشترکااجلاس سے بائیکاٹ کیا تھا۔
