کراچی: پاک بحریہ کا جہاز کل یمن سے تقریباً ایک سو پچاس پاکستانیوں کو کراچی لے کر آئے گا، پی آئی اے کی خصوصی پروازآج جبوتی پہنچے گی۔
یمن میں محصورسینکڑوں پاکستانیوں کو وطن واپس لانے کے لئے ریسکیوآپریشن جاری ہے،عدن میں موجود 215 پاکستانیوں کی وطن واپسی کے لئے چین کے بحری جہازوں کے ذریعے جبوتی منتقلی کے انتظامات مکمل ہوگئے ہیں۔
ایتھوپیا میں پاکستان کے سفیر نے جبوتی میں پاکستانیوں کے قیام، امیگریشن اور وطن واپسی کیلئےانتظامات کئے ہیں، پاکستانیوں کے جبوتی پہنچنے کے بعد کراچی سے پی آئی اے کی خصوصی پرواز انہیں وطن واپس لائے گی۔
دفتر خارجہ کی ترجمان تسنیم اسلم کا کہنا ہے کہ یمن کے شہرمکلا اور صنعا میں اب بھی درجنوں پاکستانی پھنسے ہوئے ہیں، پاک بحریہ کا جہاز مکلا سے تقریباً 150 پاکستانیوں کو کراچی لے کر آئے گا، صنعا میں اب بھی 70 سے 90 پاکستانی پھنسے ہوئے ہیں جو 2 روز قبل حدیدہ جانے والے قافلے میں شامل نہیں ہو سکے تھے۔ سعودی حکام سے درخواست کی گئی ہے کہ وہ’ نو فلائی زون‘سے استثنیٰ دے۔
