پشاور: گلبرگ کے مختلف علاقوں میں پولیس کا افغان مہاجرین کے خلاف گرینڈ آپریشن جاری ہے، جس کے دوران کئی غیر قانونی طور پر مقیم مہاجرین کو حراست میں لے لیا گیا ہے۔
آرمی پبلک اسکول پر حملے کے بعد شہر کے مختلف علاقوں میں غیر قانونی طور پر مقیم افغان مہاجرین کے خلاف آپریشنز کا سلسلہ جاری ہے، غیر قانونی طور پر مقیم افغان مہاجرین کے خلاف پشاور کینٹ کے مختلف علاقوں گلبرگ ،نوتھیہ، لنڈی سڑک کے علاقوں میں پولیس فورس نے بڑئے پیمانے پر سرچ آپریشن کیا۔
جس میں سراغ راساں کتوں اور بم ڈسپوزل یونٹ کی مدد بھی لی گئی، سرچ آپریشن میں گھر گھر تلاشی کے ساتھ غیر قانونی طور پر مقیم افغان مہاجرین کو حراست میں لیا گیا ہے جبکہ کرایے پر مقیم رہائشیوں کے گھروں کی جیو ٹیکنگ بھی کی گئی۔
سرچ آپریشن میں کئی مشتبہ افراد کو بھی حراست میں لیا گیا ہے، پولیس کے مطابق شہر بھر میں غیر قانونی طور پر مقیم افغان مہاجرین کے خلاف سرچ آپریشن کا سلسلہ جاری رکھا جائے گا۔
واضح رہے کہ 16 دسمبر کو پشاور میں آرمی پبلک اسکول پر دہشتگردوں کا حملہ ہوا ،جس کے نتیجے میں 148 افراد شہید ہوئے، شہید ہونے والوں میں 140 بچے شامل تھے۔
