پنجاب :لاہور سمیت مختلف شہروں میں مون سون بارشوں نے تباہی مچادی ہے، جس کے باعث مخنلف حادثات میں سو سے زائد افراد جاں بحق ہوگئے جبکہ مختلف علاقوں میں اب بھی لوگ ملبے تلے دبے ہیں۔
پنجاب بھر میں بارشوں کے باعث حادثات میں متعدد افراد جان سے گئے اور درجنوں زخمی ہوگئے ہیں، تیز بارشوں سے راولپنڈی میں کئی مکانات کی چھتیں گر جانے سے بڑی تعداد میں لوگ ملبے تلے دب گئے، لاہور میں بارشوں کے بعد جگہ جگہ گندگی کے ڈھیر لگ گئے جبکہ بجلی کی تاریں گر جانے سے کئی علاقوں میں گھنٹوں سے بجلی غائب ہے۔
سیالکوٹ اور بہاولنگر میں جگہ جگہ بارش کا پانی بھر جانے سے شہریوں کی مشکلات میں اضافہ ہوگیا ہے، چشتیاں میں مکان کی چھت گرنے سےایک ہی خاندان کے کئی افراد لقمہ اجل بن گئے، ناروال میں کئی فٹ پانی کھڑا ہوجانے سے مسافروں کی گاڑیاں پھنس گئیں۔
فیصل آباد اور گوجرانوالہ میں بھی تیز بارش نے سڑکوں کو ندی نالوں میں بدل کر رکھ دیا ہے، حافظ آباد اور فیروز والا میں بھی تیز بارشوں نے شہریوں کی مشکلات کو بڑھا دیا ہے۔
طوفانی بارشوں سے سرگودھا، اوکاڑہ اورساہیوال سمیت پنجاب بھر میں واننگ جاری کر دی گئی ہے جبکہ سیالکوٹ، ناروال، ہیڈ مرالہ سمیت بیشتر شہروں میں مدد کیلئے فوج بھیج دی گئی ہے۔
