گوجرانوالہ: چوروں نے خزانے کی تلاش میں مغل شہنشاہ اکبر کے قاضی القضاۃ کی قبر کھود ڈالی اور مقبرے سے انمول کلس، قیمتی نگینے، آبدار پتھر اور نایاب لکڑی کے دروازے چُرا کر لے گئے۔
تفصیلات کے مطابق گوجرانوالہ کے نواحی گائوں کوٹلی مقبرہ میں مغل اعظم شہنشاہ جلال الدین محمد اکبر کے قاضی القضاۃ شیخ عبدالنبی کا پُرشکوہ مقبرہ ہے جو مغل شہنشاہ اکبر کے حکم پر چونا، ماش کی دال اور کیمیائی مادوں کا آمیزہ گوندھ کر چھوٹی اینٹوں سے بہت بڑے پلیٹ فارم پر تیار کیا گیاتھا کبھی یہ مقبرہ مغلیہ فن تعمیر کا انمول شاہکار تھا لیکن آج کل زمانے کی دست برد اور چوروں کی لوٹ کھسوٹ کا منہ بولتا ثبوت بن کے رہ گیا ہے۔
مقبرے کے بہت بڑے گنبد اور اونچے میناروں پر مبینہ طور پر سونے چاندی کے کلس لگے ہوئے تھے اور مشہور تھا کہ مزار کے زیریں حصے میں موجود قبروں میں بیش بہا خزانہ دفن ہے۔ کچھ عرصہ پہلے محکمہ اوقاف کے ملازمین کا روپ دھارے چند لوگ یہاں آئے اور مزار کے قریب ریت اور سریے کی ٹرالیاں اتروا کر مقبرہ کے اردگرد شٹرنگ کروا کر بظاہر مقبرہ کی تزئین و آرائش کا کام شروع کر دیا اور پھر ایک رات اندھیرے کا فائدہ اٹھاتے ہوئے مزار کے منقش دروازے، نقش و نگار والے قیمتی پتھر، گنبد اور میناروں کے کلس اور دیگر بیش قیمت جڑائو سامان اتار کر رفو چکر ہو گئے چوروں نے مبینہ خزانے کی تلاش میں قاضی القضاۃ کی قبر تک کھود ڈالی۔
کوٹلی مقبرہ کے باسیوں کا مطالبہ ہے کہ مقبرہ کی تاریخی عمارت کو اوقاف کے حوالے کیا جائے اور اس کی تزئینِ نو کرکے اسے تاریخی تفریحی مقام کی حیثیت دی جائے تاکہ یہ تاریخی ورثہ محفوظ ہو اورحکومت کی آمدنی کا ذریعہ بن سکے۔
