بیجنگ: چین کےصوبہ ہیوبی میں واقع دریائے ینگزی میں مسافر بردار بحری جہاز حادثے میں جاں بحق ہونے والے افراد کی تعداد 406 ہوگئی، جبکہ 40 ابھی بھی لاپتہ ہیں۔
اطلاعات کے مطابق تیز ہواؤں اورموسلادھار بارش کے باعث امدادی کاموں میں دشواری پیش آرہی ہے، جہاز کو دریا برد ہوئے ایک ہفتہ بیت چکا ہے۔
مسافر بردار بحری جہاز میں عملے کے سینتالیس ارکان سمیت چار سو اٹھاون افراد سوار تھے، بحری جہاز کی منزل مشرقی صوبے جیانگ سو کے شہر نانجنگ سے جنوب مغرب میں واقع صوبہ ہیوبی میں واقع شہر چیانگنگ تھی کہ جہاز دریائے ینگزی میں طوفان کی زد میں آگیا۔
شدید طوفانی بارش نے جہاز کو دریا بُرد کردیا۔
ریسکیو ذرائع کے مطابق جہاز کے کیپٹن اور چیف انجینئر سمیت صرف 14 افراد کو ہی بچایا جاسکا ہےجبکہ باقی ماندہ افراد کی تلاش جاری ہے۔
چینی خبر رساں ادارے کے مطابق ایسٹرن سٹار نامی چار منزلہ مسافر بردار تفریحی بحری جہاز میں 405چینی شہری، ٹریول ایجنسی کے پانچ ملازمین اور عملے کے 47 ارکان سوار تھے۔
واضح رہے کہ رواں سال کے آغاز میں بھی چین میں کشتی کے ایک حادثے میں 22 افراد ہلاک ہوگئے تھے۔