اسلام آباد: چینی صدرشی چن پنگ کا دورہ پاکستان عالمی میڈیا کی توجہ کا مرکز بن گیا۔
چینی صدر کا دورہ پاکستان دنیا بھر کے میڈیا کے لیے اہم اور بڑی خبر بن کر سامنے آیا، امریکا ، برطانیہ ، بھارت ، چین اور دیگر ممالک کے بڑے ٹی وی چینلز اور نیوز ویب سائیٹس پر چینی صدر کے دورہ پاکستان، پرتپاک استقبال، جے ایف طیاروں سے استقبال اور اکنامک کوریڈور اور اربوں ڈالر کے منصوبے کی شہ سرخیاں چلائی گئیں۔
چین میں ٹی وی چینلوں پر دن بھر چینی صدر کے دورہ کے حوالے سے خصوصی نشریات جاری رہیں ۔
امریکی اخبار نیویارک ٹائمز نے بھی چینی صدر کے دورہ پاکستان کے حوالے سے انتہائی تفصیلی خبریں اور تجزیے جاری کیے، بھارتی ٹی وی چینلز اور اخبارات اور ویب سائیٹس پر بھی چینی صدر کے دورہ پاکستان کو غیر معمولی اہمیت دی گئی۔
ٹائمز آف انڈیا نے اہم ترین خبروں میں چینی صدر کے دورہ پاکستان اور اربوں ڈالر کے منصوبوں کو اہمیت اور وسیع کوریج دی، برطانوی نشریاتی ادارے بی بی سی ، امریکی نشریاتی ادارے سی این این ، برطانوی اخبار گارجین، برطانوی اخبار ٹیلی گراف سمیت سوشل میڈیا پر بھی چینی صدر کا پاکستان دورے کی خبریں گرم رہیں۔
