ڈسکہ: دو وکلا کے قتل کی تحقیقات کیلئے حکومت پنجاب نے مشترکہ تحقیقاتی کمیٹی بنانے کا فیصلہ کرلیا ۔
ڈسکہ میں پولیس کے ہاتھوں ساتھیوں کے قتل کے بعد وکلا برادری بپھری تو حکومت کیلئے امن و امان کی صورتحال چیلنج بن گئی۔
وزیر اعلیٰ پنجاب نے فوری طور پر واقعے کی تحقیقات کیلئے مشترکہ تحقیقاتی ٹیم تشکیل دینے کا فیصلہ کرلیا۔
ترجمان پنجاب حکومت کے مطابق جوائنٹ انویسٹی گیشن ٹیم میں پولیس آئی ایس آئی اور آئی بی کے نمائندے شامل ہوں گے۔
وزیراعلیٰ نے چیف سیکرٹری کوہدایت کی کہ واقعے کی جوڈیشل انکوائری کے لئے چیف جسٹس کو خط لکھا جائے۔
پنجاب حکومت کے ترجمان زعیم قادری نے اے آر وائی نیوز سے گفتگو میں کہا کہ واقعہ افسوسناک ہے لیکن وکلا بھی قانون کے دائرے میں رہیں۔
واقعے کی اطلاع پر وزیر اعظم نے بھی نوٹس لیتے ہوئے شہباز شریف سے رپورٹ طلب کی تھی وزیر داخلہ چوہدری نثار نےبھی جاں بحق افراد کے لواحقین سے تعزیت کی اور آئی جی پنجاب سے واقعہ کی رپورٹ طلب کرلی۔
