کراچی میں دو دن کے بعد سی این جی اسٹیشن کہیں کھلے تو کہیں بند ہے، ٹرانسپورٹرز کی ہڑتال کے باعث لوگوں کو دفاتر پہنچنے میں مشکلات کا سامنا کرنا پڑا جبکہ رکشہ ٹیکسی ڈرائیور نے من مانے کرایوں کی وصولی شروع کر دی۔
کراچی میں سی این جی اسٹیشن مالکان اور ٹرانسپورٹ اتحاد نے سی این جی بندش شیڈول پر تحفظات کا اظہار کرتے ہوئے غیر معینہ مدت تک ہڑتال کا اعلان کیا ہے، شہری دفاتر جانے کے لئے گھروں سے نکلے تو ایک عجیب الجھن نے ان کا استقبال کیا۔
سی این جی ایسوسی ایشن دو حصوں میں تقسیم ہوتی نظر آئی جس کی وجہ سے دو دن بندش کے بعد کہیں اسٹیشن کھلے تو کہیں بند ہے، گاڑیاں سڑکوں پر کم اور سی این جی اسٹیشن پر زیادہ نظر آئیں، شہری پبلک ٹرانسپورٹ نہ ہونے کے باعث سخت سردی میں گھنٹوں اسٹاپ پر کھڑے سواری کا انتطار کرتے رہے۔
اس موقع پر ٹیکسی اور رکشہ ڈرائیوروں نے من مانے کرائے وصول کئے، آل پاکستان سی این جی ایسوسی ایشن اور کراچی ٹرانسپورٹ اتحاد کے جاری کردہ مشترکہ اعلامیے میں کہا گیا تھا کہ جب تک گیس بندش کا پرانا شیڈول بحال نہیں کیا جائے گا تب تک ہڑتال جاری رہے گی۔
