کراچی : سانحہ صفورا کے دو ملزمان کو مزید سات روزہ جسمانی ریمانڈ پرپولیس کےحوالے کردیا گیا۔ تفصیلات کے مطابق پولیس نےسانحہ صفورا کے ملزمان کوانسداد دہشت گردی کی عدالت میں پیش کیا۔
اس موقع پر سیکورٹی کے فول پروف انتظامات کئے گئے تھے، پولیس نےجج سےاستدعا کی کہ ملزمان سے تفتیش مکمل نہیں ہوسکی ہے تاہم دونوں ملزمان کامزید ریمانڈ دیا جائے۔
دلائل سننے کےبعد انسداد دہشت گردی کی خصوصی عدالت نے سعدعزیز اوراسدالرحمان کو مزید سات دن کیلئے ریمانڈ پر پولیس کے حوالے کردیا۔
واضح رہے کہ کراچی کے علاقے صفورا چورنگی کے قریب مسلح افراد نے اسماعیلی برادری سے تعلق رکھنے والے افراد کی بس میں گھس کر اندھا دھند فائرنگ کردی تھی۔
عینی شاہدین کے مطابق مسلح افراد نے ٹوٹی پھوٹی سڑک پر بس کو روکا، اندر گھس کر ڈرائیور پر گولی چلائی اور پھر مسافروں پر گولیوں کی بارش کردی بس میں خواتین سمیت ساٹھ افراد سوارتھےجن میں سےتمام افراد کوگولیاں لگیں جن میں سے خواتین سمیت تینتالیس افراد جاں بحق ہوگئے تھے۔
