کراچی : رینجرز نے کراچی سینٹرل جیل پر دہشتگردی کے حملے کا بڑا منصوبہ ناکام بنا دیا، دہشتگرد غوثیہ کالونی سے جیل میں داخل ہونے کیلئے سرنگ بنا رہے تھے۔
خفیہ اطلاع کے ملنے اور دہشت گردی کے منصوبے کو ناکام بنانے کے لئے رینجرز کے کرنل طاہر نے پریس کانفرنس کرتے ہوئے بتایا کہ دہشتگرد کراچی کے علاقے غوثیہ کالونی کے ایک گھر سے سینٹرل جیل تک سرنگ بنا رہے تھے۔ دہشتگرد سرنگ کےذریعے جیل میں داخل ہونا چاہتے تھے۔
کرنل طاہرکا کہنا تھا کہ رینجرز کو قومی سلامتی کے اداروں نے مسلح افراد کی اطلاع دی تھی، غوثیہ کالونی میں چھاپہ مارکرملزمان کوحراست میں لیا۔
رینجرز حکام نے ویڈیو بھی دکھائی، ویڈیو میں وہ ٹنکی ہے، جس کے اندر سے سرنگ بنائی جا رہی تھی اور بتایا گیا کہ دہشتگردوں نے کہاں تک سرنگ بنا لی تھی، دہشتگرد پینتالیس میٹر سرنگ کھود چکے تھے اور اپنے ہدف سے صرف دس کلو میٹر ہی دور تھے کہ پکڑے گئے سرنگ مطلوبہ ہدف سے صرف دس میٹر دور رہ گئی تھی۔
کرنل طاہر نے بتایاکہ ملزمان نے سینٹرل جیل سے قیدیوں کو چھڑانے کا منصوبہ بنایا تھا، گھرکی ٹنکی میں کھدائی کرکے دس فٹ نیچے سرنگ بنائی گئی تھی، ملزمان نے پچپن فٹ لمبی سرنگ بنانے کا منصوبہ بنایا تھا، سرنگ کو جیل میں موجود سوکھےکنویں سے ملانے کا منصوبہ تھا۔
رینجرز کے کرنل طاہر نے مزید بتایا کہ کالعدم تنظیموں کے ملزمان سرنگ کھودنے میں ملوث ہیں، ملزمان کیخلاف کارروائی عوام کےتعاون سے عمل لائی گئی۔
