کراچی: شہرِ قائد دہشتگردی کی بڑی کارروائی سے بال بال بچ گیا، کراچی کے علاقے نارتھ ناظم آباد قلندریہ چوک سے ملنے والا تین کلو وزنی بم ناکارہ بنا دیا گیا ہے۔
شہرِ کراچی کا امن برباد کرنے کی کوشش ناکام ہوگئی، نارتھ ناظم آباد قلندریہ چوک سے ملنے والا بم بروقت کارروائی کرکے ناکارہ بنا دیا گیا۔
زرائع کے مطابق کراچی کے علاقے نارتھ ناظم آباد قلندریہ چوک سے مشکوک پیکٹ برآمد ہوا، جس میں تین کلو دھماکا خیز مواد نصب کیا گیا تھا، ایس پی چوہدری اسد کے مطابق بم مسجد کے قریب سے برآمد ہوا۔
چوہدری اسد نے بتایا کہ دہشتگردوں کے ہدف سے متعلق کچھ کہنا قبل ازوقت ہوگا ۔
بی ڈی ایس کی ابتدائی رپورٹ کے مطابق دھماکے کی صورت دو سو گز کے اطراف بڑی تباہی ہوتی، ریموٹ کنٹرول ڈیوائس سے منسلک بم کے ساتھ بیٹری سیل کے ساتھ الیکٹرک ڈیٹونیٹر کمرشل ایکسپلوزیو اور ڈیڈکارڈ لگا ہوا تھا، بم کے اپرو القاعدہ برصغیر تحریر کندہ تھی۔
پولیس نے ایک مشکوک شخص کو حراست میں لیکر تفتیش کا آغاز کردیا ہے، واقعے کے بعد قلندریہ چوک کے اطراف نصرت بھٹو کالونی میں ناکہ بندی کرکے سرچ آپریشن کیاجارہا ہے۔
