کراچی: شہر قائد میں امن و امان کی بدترین صورتحال کے باعث کراچی میں تین روزکےلیےموٹرسائیکل کی ڈبل سواری پرپابندی عائد کردی گئی۔
محکمہ داخلہ سندھ نے اورنگی ٹاؤن کے علاقے بنارس کالونی میں پولیو ٹیم پر ہونے والے حملے کے بعد شہر میں ڈبل سواری پر تین روز کیلئے پابندی عائد کردی ہے ، پابندی کا اطلاق آج رات بارہ بجے سے بائیس جنوری رات بارہ بجے تک ہوگا، جس کا باضابطہ نوٹی فکیشن جاری کردیا گیا ہے ۔
ذرائع کے مطابق آئی جی سندھ نے چار روزہ پولیو مہم کی سیکیورٹی بہتر کرنے کیلئے محکمہ داخلہ کو ڈبل سواری پر پابندی کی سفارش کی تھی جس کی روشنی میں پابندی عائد کی گئی ہے ۔ واضح رہے کہ کراچی میں آج سے پولیو مہم کا آغاز ہوچکا ہے ،اس دوران پولیو ٹیم پر حملے میں پولیس اہلکار جاں بحق ہوا، یہ پولیو مہم بائیس جنوری تک جاری رہے گی ۔
محکمہ داخلہ کی جانب سے جاری نوٹی فکیشن میں کہا گیا ہے کہ پابندی کا اطلاق بزرگ، خواتین ، بچوں ، قانون نافذ کرنے والے اداروں کے اہلکاروں اور صحافیوں پرنہیں ہوگا۔
