کراچی: شہرِ قائد کےعلاقے ناظم آباد میں دہشت گرد نجی اسکول پر دستی بم پھینک کر فرار ہوگئے، خوش قسمتی سے حملے میں کوئی جانی نقصان نہیں ہوا۔
دہشت گردوں نےایک بار پھر خوف وہراس پھیلانے کیلئےاسکول کو نشانہ بنایا مگر اپنے مقصد میں کا میاب نہ ہوسکے۔
پولیس کے مطابق کراچی کے علاقے نارتھ ناظم آباد کے نجی اسکول کے باہر دہشت گردوں نے دستی بم سے حملہ کیا لیکن کوئی جانی نقصان نہیں ہوا، اسکول انتظامیہ نے بروقت پولیس اور بم ڈسپوزل سکواڈ کو طلب کر لیا۔ .
حملے کے وقت اسکول میں کلاسیں ہورہی تھیں, جس سے بچوں میں خوف و ہراس پھیل گیا, حملے کے بعد دہشت گردوں نے دھمکی آمیز خط بھی پھینکا۔
اطلاعات کے مطابق دستی بم اور دھمکی آمیز خط کے ڈی اے چورنگی کے قریب بیکن ہاؤس اسکول پر پھینکا گیا۔
صو بائی وزیر تعلیم نثار کھوڑو نے ایڈیشنل آئی جی کو تحقیقات کر نے کی ہدایت کردی ہے، ڈی آئی جی ویسٹ طاہر نوید کا کہنا تھا کہ واقعہ کی تحقیقات کی جارہی ہے، پولیس کے مطابق اسکول انتظامیہ طے کردہ سیکیورٹی طریقہ کار پرعمل نہیں کر رہی تھی۔
واضح رہے گزشتہ ماہ کراچی کے علاقے گلشن اقبال میں واقع دو نجی سکولوں پر بھی دستی بم پھینکے گئے لیکن اسکول بند ہونے کی وجہ سے کوئی نقصان نہیں ہوا، دو دستی بموں میں ایک نجی سکول کے اندر جبکہ دوسرا سکول کے باہر پھینکا گیا۔
اس سے قبل نارتھ ناظم آباد میں واقع عبداللہ گرلز کالج میں بھی دھمکی آمیز پرچہ موصول ہوچکا ہے۔
