کراچی : شہرِ قائد کے علاقے کریم آباد میں پی ٹی آئی کا گرایا جانے والا انتخابی کیمپ کس نے ہٹایا معمہ بن گیا ہے، تحریکِ انصاف کے امیدوارعمران اسماعیل کا کہنا ہے کہ کیمپ ہٹانے میں وہی عناصر ملوث ہیں، جنہوں نے رات میں حملہ کیا۔
قومی اسمبلی کے حلقہ این اے246 کا انتخابی دنگل سج گیا اور سیاسی درجہ حرارت میں ہر گزرتے دن کیساتھ اٖضافہ ہورہا ہے۔
گزشتہ روز گرایا گیا پی ٹی آئی کیمپ آج کس نے ہٹایا کسی کو نہیں معلوم، اے آر وائی سے گفتگو میں عمران اسماعیل کا کہنا تھا کہ مخالفین شکست دیکھ کربوکھلا گئے ہیں۔
تحریک انصاف کے امیدوار کا کہنا تھا کہ دوبارہ کیمپ لگا کر انتخابی سرگرمیاں شروع کریں گے۔
یاد رہے کہ کریم آباد میں پی ٹی آئی کے الیکشن کیمپ پر نامعلوم افراد نے دھاوا بول دیا تھا، ایم کیوایم کا کہنا تھا کہ یہ انکے کارکن نہیں، ایم کیوایم کے رہنماء حیدرعباس رضوی نےاے آروائی سے بات کرتے ہوئے کہا تھا کہ پی ٹی آئی کے کیمپ پر وہ خود بیٹھیں گے۔
پی ٹی آئی نے الزام لگایا جنہوں نے اکھاڑا تھا وہی سامان بھی لے گئے۔
دوسری جانب ایم کیو ایم کے امیدوار کنور نوید نے پی ٹی آئی کا کیمپ خود لگانے کی پیش کش کردی۔
واضح رہے کہ کراچی میں نبیل گبول کی نشست پر ضمنی الیکشن تئیس اپریل کو ہورہےہیں، تحریک انصاف نے ایم کیوایم کے گڑھ سے امیدوار کھڑا کردیا۔ جس سےسیاسی گرما گرمی پیدا ہوگئی ہے۔
