کراچی: شہر کے مرکزی علاقے صدر سمیت مختلف علاقوں کو ملانے والی شاہراؤں پربدترین ٹریفک جام ہوگیا، وزیرِاعلیٰ سندھ نے ٹریفک جام کا نوٹس لے لیا۔
تفصیلات کے مطابق شہر کے مرکزی علاقے مزارِقائد سے لے کر صدراور تمام ملحقہ علاقوں میں پیرکی شام سے شدید ٹریفک جام ہے جس کے باعث دیگرمرکزی شاہراؤں سمیت شاہراہ فیصل، آئی آئی چندریگرروڈ اورکورنگی کازوے پربھی بدترین ٹریفک جام ہوگیا ہے اور ہزاروں گاڑیاں اس جام میں پھنس کررہ گئی ہیں۔
جبکہ کیماڑی، گلبہار، لیاقت آباد، عائشہ منزل،گلشن اقبال سمیت ملیر اور قائد آباد میں بھی ٹریفک جام کی اطلاعات ہیں۔
وزیرِ اعلیٰ سندھ سید قائم علی شاہ نے ٹریفک جام کا نوٹس لیتے ہوئے متعلقہ حکام کو فوری طور پرٹریفک کی صورتحال کو قابو کرنے کا حکم دیا ہے۔
ٹریفک جام کے باعث کئی ایمبولینس گاڑیاں بھی پھنس کر رہ گئی ہیں جبکہ کئی گاڑیوں میں ایندھن ختم ہونے کے باعث ٹریفک کی صورتحال میں مزید ابتری پیدا ہورہی ہے۔
ذرائع کے مطابق اس وقت شہر کے ساٹھ فیصد سے زائد سگنل کام نہیں کررہے ہیں جس کے باعث ٹریفک جام کی صورتحال پیدا ہوئی ہے۔