کراچی : جامع کلاتھ مارکیٹ میں کھلونوں کی فیکٹری میں آگ لگنے سےلاکھوں روپے کا سامان راکھ کا ڈھیر بن گیا جبکہ سندھی مسلم سوسائٹی میں بھی عمارت آگ کی لپیٹ میں آگئی۔
جامعہ کلاتھ مارکیٹ میں صبح کھلونے بنانے والی فیکٹری میں اچانک آگ بھڑک اٹھی، جس نے دیکھتے ہی دیکھتے پوری فیکٹری کو اپنی لپیٹ میں لے لیا۔ آگ کی وجہ سے فیکٹری میں لاکھوں روپے مالیت کا سامان خاکستر ہوگیا۔
آ تشزدگی کی اطلاع پر فائر بریگیڈ کی سات گاڑیاں موقع پر پہنچیں، تاہم تنگ گلی کے باعث فائر فاٹرز کوآگ بجھانے میں کافی دقت پیش آئی۔
کئی گھنٹوں کی جدوجہد کے بعد آگ پر قابو پایا اور کولنگ کا عمل مکمل کیا، آ گ کے شعلوں اور دھوئیں سے اطراف کی عمارتوں کے مکین بھی پریشان ہوئے، ریسکیو ذرائع کے مطابق آگ شارٹ سرکٹ کے باعث لگی۔
دوسری جانب سندھی مسلم سو سائٹی میں بھی عمارت کی چوتھی منزل آگ کی لپیٹ میں آگئی، آگ لگنے سے عمارت میں موجود افراد محصور ہوگئے، جنھیں ریسکیو حکام نے باحفاظت باہر نکالا، آگ لگنے کی وجہ معلوم نہ ہوسکی۔
