قاہرہ: مرد گنجے پن کو اپنی شخصیت کے لئے معیوب سمجھتے ہیں اور بعض اوقات یہی گنجا پن بیوی کی ناراضگی کا سبب بن کر بات علیحدگی تک بھی جا پہنچتی ہے.
ایک واقعہ مصر میں پیش آیا، جہاں ایک خاتون نے عدالت کے ذریعے اپنے شوہر سے محض اس لیے خلع لےلی کہ اس کا شوہر گنجا ہے، عرب میڈیا رپورٹس کے مطابق قاہرہ کی ایک فیملی کورٹ نےحال ہی میں’جیلان’ نامی خاتون کی اپنے شوہر ‘آسرم’ سے خلع کی درخواست پر فیصلہ دیتے ہوئے دونوں میں علیحدگی کرادی۔
خلع حاصل کرنے والی خاتون نے درخواست میں مؤقف اختیار کیا تھا کہ شوہر کے گنجا ہونے کی وجہ سے اسے اپنی سہیلیوں میں شرمندی کا سامنا کرنا پڑتا ہے، لہٰذا عدالت اپنے خصوصی اختیارات کے ذریعے اسے خلع دلوائے۔
خاتون کا مزید کہنا تھا کہ میں نے گنجے شوہر سے کئی بار سر میں مصنوعی طریقے سے بال لگوانے کا بھی مطالبہ کیا مگر اس نے میری بات نہ سنی، جس کے بعد میں نے محسوس کیا کہ میں ایسے شخص کی بیوی نہیں رہ سکتی، جو میرے لیے میری سہیلیوں میں مسلسل شرمندی کا موجب بنا رہے، میں نے اس سے طلاق مانگی تو اس نے انکار کر دیا، جس کے بعد مجھے عدالت کے ذریعے خلع لینے پر مجبور ہونا پڑا ہے۔
