تیظ : یمن کے شہر تیظ میں حوثی قبائل اور سابق صدر کے حامیوں کے درمیان شدید جھڑپیں جاری ہیں، ایران نے یمن میں قیامِ امن کے لئے چار نکاتی منصوبہ پیش کردیا۔
یمن میں صنعاء اور عدن میں سعودی عرب اور اتحادی افواج نے حوثی قبائل کے ٹھکانوں پر بمباری کے بعد تیظ کا رخ کیا ہے جبکہ تیظ میں حوثی قبائل اور سابق صدر ہادی کے حامیوں کے درمیا ن شدید جھڑپیں جاری ہیں۔
یمنی حکام کے مطابق تازہ جھڑپوں میں آٹھ شہری ہلاک ہوئے ہیں۔
ایرانی وزیرِخارجہ محمد جواد ظریف نے یمن میں قیام امن کے لئے ایک چار نکاتی منصوبہ پیش کیا ہے، اس منصوبے کے تحت یمن میں فوری جنگ بندی اور اس کے بعد تمام فریقوں کے درمیان غیرملکیوں کی ثالثی میں مذاکرات کی تجویز پیش کی گئی۔
ایران کی جانب سے پیش کئے گئے نکات میں تمام فریقوں میں جنگ بندی ، جنگ سے متاثرہ علاقوں میں انسانی امداد بہم پہنچانے،یمنی دھڑوں کے درمیان مذاکرات اور وسیع البنیاد حکومت قائم کرنے کی تجاویز شامل ہیں۔
