سیالکوٹ: سیالکوٹ میں انسانیت سوز واقعہ پیش آیا جہاں نجی فیکٹری ملازمین نےغیر ملکی فیکٹری منیجر کو وحشیانہ تشدد کا نشانہ بنانے کے بعد آگ لگادی۔
تفصیلات کے مطابق افسوسناک واقعہ وزیر آباد روڈپر پیش آیا، جہاں غیر ملکی فیکٹری منیجر پر فیکٹری ملازمین نے انسانیت سوز تشدد کیا، غیر ملکی مینیجر پر لاٹھیوں، ڈنڈوں سے وار کئے گئے اور اسے لہولہان کیا گیا۔
مشتعل افراد کو پھر بھی رحم نہ آیا اور انہوں نے شدید زخمی غیر ملکی مینیجر کو آگ لگادی، جس کے باعث وہ جھلس کر ہلاک ہوگیا، واقعے کے بعد ملازمین نے فیکٹری کے باہر بھی ہنگامہ آرائی اور توڑ پھوڑ کی اور گاڑی کو بھی نقصان پہنچایا، اس موقع پر پولیس خاموش تماشاہی بنی رہی۔
وزیراعلیٰ پنجاب نے سیالکوٹ کی فیکٹری میں پیش آنیوالے افسوسناک واقعےکا نوٹس لیتے ہوئے آئی جی پنجاب سےفوری رپورٹ طلب کرلی ہے اور معاملے کی انکوائری کا حکم دے دیا ہے۔
وزیراعلیٰ عثمان بزدار نے سخت ہدایت کی کہ واقعہ کی ہر پہلو سے تحقیقات کرکے رپورٹ پیش کی جائے، کسی کو بھی قانون ہاتھ میں لینے کی اجازت نہیں دی جاسکتی، پولیس قانون ہاتھ میں لینے والوں کیخلاف قانون کے تحت کارروائی کریں۔
دوسری جانب آئی جی پنجاب نے بھی افسوسناک واقعے کا نوٹس لیا ہے اور آئی جی پنجاب راؤ سردار علی اور آر پی او گوجرانوالہ کو فوری طور پر جائے حادثے پر پہنچنے کی ہدایت کی ہے، آئی جی پنجاب نے کہا کہ موقع پرموجود ڈی پی او سیالکوٹ و دیگر تمام پہلوؤں سےواقعے کی انکوائری کریں۔
