The news is by your side.

Advertisement

امریکہ میں دو خواتین سمیت چار افراد کی درد ناک ہلاکت

واشنگٹن : امریکہ میں فائرنگ کے مختلف واقعات میں بڑے پیمانے پر عام لوگوں کی ہلاکت کی خبریں معمول بنتی جا رہی ہیں، ایک اور واقعے میں خواتین سمیت چار افراد ہلاک ہوگئے۔

تفصیلات کے مطابق امریکی ریاست واشنگٹن کے شہر ٹاکوما میں فائرنگ کا واقعہ پیش آیا ہے جس میں دو خواتین سمیت چار افراد کی ہلاکت کی اطلاعات ہیں۔

امریکی خبر رساں ادارے کے مطابق جمعرات کی دوپہر کو ہونے والی فائرنگ کے حوالے سے ٹاکوما پولیس ڈیپارٹمنٹ نے امریکی وقت کے مطابق شام ساڑھے پانچ بجے ٹوئٹر پر بتایا کہ دو خواتین اور ایک مرد موقع پر ہی ہلاک ہوگئے جبکہ ایک مرد کو انتہائی تشویش ناک حالت میں ہسپتال لے جایا گیا تھا۔

اس کے بعد ساڑھے چھ بجے پولیس نے ٹویٹ کی کہ ہسپتال لے جائے جانے والے شخص کی بھی موت واقع ہوگئی۔ پولیس نے دی نیوز ٹریبیون کو بتایا کہ مرنے والے افراد بالغ نظر آرہے تھے، پولیس نے بتایا کہ فائرنگ شہر کے مشرقی علاقے کے قریب ایوریٹ سٹریٹ کے 4200 بلاک پر ہوئی۔

پولیس کی ترجمان وینڈی ہیڈو نے اخبار کو بتایا کہ فائرنگ ایک رہائش گاہ کے پیچھے ایک گلی میں ہوئی اور اور مرنے والا ایک شخص رہائش گاہ کے سامنے والی گلی میں پایا گیا۔

پولیس کا کہنا تھا کہ لوگ علاقے سے دور رہیں کیونکہ ابھی خطرہ برقرار ہے، سراغ رساں اور پولیس کا دوسرا عملہ واقعے کی جگہ پر موجود ہیں تاہم مزید معلومات فوری طور پر دستیاب نہیں ہوسکیں۔

Comments

یہ بھی پڑھیں