پشاور: صوبائی دارالحکومت میں انٹرنیشنل باکسنگ کا میلہ آج سجے گا، ایونٹ میں پاکستان، افغانستان اور ایران کے بہترین باکسر شرکت کریں گے۔
تفصیلات کے مطابق صوبائی حکومت کے تعاون سے انٹرنیشنل پروفیشنل باکسنگ مقابلوں کا میلہ آج قیوم اسپورٹس کمپلیکس پشاور میں سجے گا جس کیلئے تمام انتظامات مکمل کرلئے گئے ہیں اور کھلاڑی پشاور پہنچ چکے ہیں، پشاور آمد پر ملکی و غیر ملکی باکسرز کا شاندار استقبال کیا گیا۔
ڈائریکٹرجنرل اسپورٹس اسفندیار خان خٹک نے میڈیا سے گفتگو کرتے ہوئے بتایا کہ پشاور اسپورٹس کمپلیکس میں کھیلے جانیوالے ان مقابلوں میں پاکستان کے مختلف شہروں سمیت افغانستان اور ایران کیساتھ دوسری ممالک سے باکسرز حصہ لینگے۔
ایشین باکسنگ چیمپئن عثمان وزیر ٹورنامنٹ کے انعقاد پر بے حد خوش ہیں، میڈیا سے گفتگو میں انہوں نے کہا کہ پاکستان اور خصوصاخیبر پختونخوا میں باکسنگ کے حوالے سے کافی ٹیلنٹ موجود ہے، اس ٹیلنٹ کو سامنے لانے کیلئے مواقع مہیا کرنا چاہئے۔
باکسرعثمان وزیر کا کہنا تھا کہ پاکستان کے مختلف شہروں میں انٹرنیشنل پروفیشنل باکسنگ کا انعقاد سنگ میل ثابت ہوگا۔
پاکستان کے کامران خان مین فائٹ میں افغان حریف حامد خان سے ٹکرائیں گے، کو مین فائٹ میں پاکستان کے یامین کا مقابلہ افغانی حریف ہارون سے ہوگا۔
