گجرات: ہندوستان کی ریاست گجرات میں 2002 میں ہونے والے مسلم کش فسادات میں سینکڑوں مسلمانوں کو قتل اور زندہ جلانے پر 11 ملزمان کو 7 سال کی قید سنا دی گئی ہے۔
تفصیلات کے مطابق 2002 میں بھارت کی ریاست گجرات کے علاقے احمد آباد کی گلبرگ سوسائیٹی میں ہندو انتہا پسندوں نے سینکڑوں مسلمانوں کو قتل اور ہزاروں مسلمان کو بے گھر کر دیا تھا،قتل ہونے والوں میں کانگریس کی مسلم رکن اسمبلی بھی شامل تھی۔
عالمی سطح پر بھارت کی بدنامی کا باعث بننے والے اس واقعہ میں ملوث مرکزی کردار سمیت 11 مجرموں کو 7 سال قید کی سزا سنا دی گئی ہے۔
بھارتی میڈیا کے مطابق سزا پانے والوں میں قتل عام کے مرکزی کردار اور انتہاپسند ہندو رہنما شامل ہیں۔
واضح رہے بھارت کی ریاست گجرات میں فروری اور مارچ 2002ء گودھرا ریل آتشزدگی سے 59 انتہاپسند ہندو ہلاک ہو گئے تھے،انتہا پسند تنظیموں نے اس واقعہ کا الزام مسلمانوں پر لگا یا جس کے بعد سرکاری آشیر باد میں مسلمانوں کا قتل عام کیا گیا۔
انسانی حقوق کی تنظیموں کے مطابق یہ مسلمانوں کی نسل کشی تھی،اس میں مسلم رکن پارلیمنٹ سمیت تقریباً 2500 مسلمانوں کو بے رحمی سے قتل کیا گیا یا زندہ جلا دیا گیا تھا،سینکڑوں مسلمان خواتین کی عصمت دری کی گئی،ان فسادات کے نتیجے میں ہزاروں مسلمان بے گھر ہوگئے تھے۔
اس ہولناک سانحہ کا افسوسناک پہلو یہ تھا کہ ان فسادات کو روکنے کے لیے پولیس نے کوئی کردار ادا نہ کیا بلکہ گجرات کے اس وقت کے وزیر اعلٰی نریندر مودی نے اس قتل و غارت گری کی سرپرستی کی تھی۔
یاد رہے اس وقت کی بھارت میں وفاقی حکومت کی کمان بی۔جے۔پی۔ پارٹی کے ہاتھوں میں تھی،تاہم وہ بھی گجرات میں مسلم کش فسادات روکنے میں بری طرح ناکام رہی تھی۔
یورپی یونین نے اس نسل کشی پر کھلے عام احتجاج کرنے سے گریز کیا، اور یہی طرز عمل امریکہ کا بھی رہا۔
تاحال مسلمان اس ریاست میں مہاجروں کی طرح رہ رہے ہیں، اور دوسرے درجے کے شہری سمجھے جاتے ہیں۔
