The news is by your side.

Advertisement

مارچ میں گرمی کا ریکارڈ ٹوٹ گیا

بدھ کے روز کراچی میں گرمی کا 12 سالہ ریکارڈ ٹوٹ گیا درجہ حرارت 42.5 ڈگری رہا، سہ پہر میں سمندری ہوائیں بحال ہوگئیں۔

کراچی میں بدھ کے روز شدید گرمی پڑی اور درجہ حرارت 42.5 ڈگری سینٹی گریڈ تک جا پہنچا جس کے نتیجے میں مارچ میں کراچی میں گرمی کا 12 سالہ ریکارڈ ٹوٹ گیا اس سے قبل 20 مارچ 2010 کو کراچی میں زیادہ سے زیادہ درجہ حرارت 42.2 ڈگری سینٹی گریڈ ریکارڈ کیا گیا۔

کراچی میں صبح سے ہی سمندری ہوائیں بند تھیں۔ لو چلنے اور سورج کی تپش کے باعث گرمی کی شدت 44 ڈگری سینٹی گریڈ سے زائد محسوس کی گئی جب کہ ہوا میں نمی کا تناسب 7 فیصد ہوگیا۔

شدید گرمی کے باعث شہریوں کو سخت مشکلات کا سامنا کرنا پڑا اور کئی علاقوں کی بجلی کی اعلانیہ اور غیر اعلانیہ بندش کے باعث ان کی اذیت دوچند ہوگئی۔ کھلے آسمان تلے کام کرنے والے مزدور دوپہر کے اوقات میں درختوں اور اونچی عمارتوں کے سائے تلے بیٹھے رہے۔

دریں اثنا سہ پہر کے وقت شہر میں سمندری ہوائیں بحال ہوگئیں جس کے باعث درجہ حرارت نیچے آگیا اور 40 ڈگری سینٹی گریڈ سے کم ہوگیا جب کہ ہوا میں نمی کا تناسب 8 فیصد ریکارڈ کیا گیا۔ اس وقت شہر میں جنوب مغربی سمت سے ہوا 18 کلومیٹر فی گھنٹہ کی رفتار سے چل رہی ہے۔

یاد رہے کہ محکمہ موسمیات نے شہر میں شدید گرمی کا الرٹ جاری کیا ہے، شدید گرمی کی نئی لہر یکم اپریل تک جاری رہے گی۔

Comments

یہ بھی پڑھیں