راولپنڈی : ڈی جی آئی ایس پی آر لیفٹیننٹ جنرل احمد شریف چوہدری نے تصدیق کی ہے کہ معرکہ حق میں بھارت پاکستان کا کوئی بھی طیارہ نہیں گراسکا۔
تفصیلات کے مطابق ڈی جی آئی ایس پی آر لیفٹیننٹ جنرل احمد شریف چوہدری نے غیر ملکی جریدے بلومبرگ کو انٹرویودیتے ہوئے کہا پاکستان کی دفاعی ترقیاتی حکمتِ عملی ہمیشہ مؤثر اور کارگر پلیٹ فارمز کے ساتھ اندرونِ ملک تیار کردہ ٹیکنالوجی کو شامل کرنے پر مبنی رہی ہے۔
لیفٹیننٹ جنرل احمد شریف چوہدری کا کہنا تھا کہ ہم ہر قسم کی ٹیکنالوجی چاہے وہ خود ساختہ ہو یا مشرقی اور مغربی ہو کےحصول کے لیے تیار رہتے ہیں تاہم پاکستان بھارت کے ساتھ ہتھیاروں کی دوڑ میں شامل نہیں ہے۔
ان کا کہنا تھا کہ پاکستان نے کبھی بھی اعداد و شمار اور حقائق سے کھیلنے یا چھپانے کی کوشش نہیں کی اور تصدیق کی کہ معرکہ حق میں ہندوستان پاکستان کا کوئی بھی طیارہ نہیں گرا سکا۔
بلومبرگ کی رپورٹ کے مطابق ایک ہفتہ قبل امریکی صدر ڈونلڈ ٹرمپ نے بھی 7 بھارتی طیارے مار گرائے جانے کی تصدیق کی تھی، رپورٹ میں مزید کہا گیا کہ "معرکۂ حق” میں پاکستان کے چینی ساختہ J-10C طیاروں نے رافیل سمیت بھارتی فضائیہ کے متعدد طیارے تباہ کیے۔
ڈی جی آئی ایس پی آر نے پاکستانی ہتھیاروں اور چینی دفاعی پلیٹ فارمز کی مؤثر کارکردگی کی بھی توثیق کی۔، رپورٹ کے مطابق، گزشتہ ماہ پاکستان نے Z-10ME حملہ آور ہیلی کاپٹر کو اپنے ہتھیاروں میں شامل کرنے کا اعلان کیا۔
رپورٹ میں کہا گیا کہ پاکستان چینی ہتھیاروں کے ساتھ ساتھ امریکی ساختہ F-16 طیاروں کا بھی استعمال کرتا ہے، جو ملکی دفاعی نظام کو مزید مضبوط بناتا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں