پنجاب ضمنی الیکشن میں دھاندلی سے متعلق پی ٹی آئی کے خدشات درست ثابت ہوئے، الیکشن کمیشن نے سنگین غلطی کو تسلیم کرلیا۔
تفصیلات کے مطابق لاہور ہائیکورٹ میں ووٹر لسٹوں میں غلطی کے خلاف درخواست کی سماعت ہوئی ، درخواست گزار پی ٹی آئی رہنما یاسمین راشد نے مؤقف اپنایا کہ الیکشن کمیشن نے زندہ لوگوں کو مردہ قرار دیدیا ہے۔
دوران سماعت صوبائی الیکشن کمیشن نے پی ٹی آئی کے الزامات کو تسلیم کرتے ہوئے عدالت کو بتایا کہ ڈیٹا آپریٹر کی غلطی سے چالیس لاکھ لوگوں کو فوت شدگان لکھا گیا، یہ انسانی غلطی تھی جسے فوری طور پر ٹھیک کیا گیا۔
صوبائی الیکشن کمشنر نے عدالت کو بتایا کہ ووٹرلسٹ پر غلطی سےپرنٹنگ دو جون کی تاریخ لکھی ہوئی ہے یہ اپ ڈیٹ ہونیوالی لسٹ عام انتخابات کیلئے ہے، پنجاب اسمبلی کے ضمنی الیکشن پچیس مئی دو ہزار بائیس کو اپ ڈیٹ ہونے والی لسٹ کے مطابق ہوگا۔
الیکشن کمیشن کے جواب کے بعد لاہور ہائیکورٹ نے ڈاکٹر یاسمین راشد کی درخواست نمٹا دی، عدالت نے حکم دیا کہ اگر یاسمین راشد کی ضمنی الیکشن سے متعلق اگر کوئی درخواست زیرالتوا ہے تو الیکشن کمیشن اس کا فیصلہ کرے۔
عدالتی فیصلے کے بعد اے آر وائی نیوز سے خصوصی گفتگو میں پی ٹی آئی رہنما یاسمین راشد نے کہا کہ لاہور ہائیکورٹ نے نوٹس لیا جو کہ اچھی اور خوش آئند بات ہے، میں ووٹرلسٹ اور الیکشن ٹریبونل کا معاملہ عدالت میں لیکر گئی، ہم چاہتے ہیں کہ پولنگ ایجنٹ وہاں بیٹھیں اور دھاندلی پر نظر رکھیں، ہمیں ہر صورتحال کےلئے الرٹ رہنا چاہیے۔
یاسمین راشد نے کہا کہ الیکشن کمشنر پر واضح کیا کہ جمہوریت اسوقت مضبوط ہوگی جب الیکشن شفاف ہو،صاف و شفاف الیکشن ہونگے تو ہی جمہوریت مضبوط ہوتی ہے۔
