دبئی: متحدہ عرب امارات میں آج سے ویزا ایمنسٹی اسکیم کا آغاز ہونے کے بعد 1534 افراد فائدہ اٹھانے پہنچ گئے ہیں۔
عرب میڈیا کے مطابق متحدہ عرب امارات میں ویزا ایمنسٹی اسکیم کا آغاز ہونے کے بعد متعدد شہریوں نے امارات میں ویزا ایمنسٹی اسکیم کے دفاتر کا رخ کرلیا، 18 سال سے غیرقانونی طور پر رہائش پذیر ایک شہری پر عائد دس لاکھ درہم کا جرمانہ معاف کردیا گیا۔
امارات میں غیر قانونی طور پر رہائش پذیر ایک ایشین فیملی بھی ویزا ایمنسٹی اسکیم کے دفاتر پہنچی، فیملی نے کوئی دستاویز پیش نہیں کی لہٰذا ان پر عائد جرمانے کو معاف کرتے ہوئے 10 دن میں ملک چھوڑنے کی ہدایت کی گئی ہے۔
امارات میں قائم الویر سینٹر کی جانب سے 326 افراد کو آؤٹ پاسز جاری کئے گیے اور جرمانہ عائد کیے بغیر ملک چھوڑنے کا کہا گیا ہے۔
حکام کے مطابق ویزا ایمنسٹی اسکیم کے پہلے روز 408 افراد نے ویزے کی تجدید کے رابطہ کیا، 260 افراد نئے اسپانسرز کے ساتھ اپنی رہائشی حیثیت میں ترمیم کرنے کے لیے پہنچے جبکہ 416 افراد کے ویزا کینسل کرنے کے لیے درخواست جمع کرائی۔
گلف نیوز کے مطابق 20 سالہ بھارتی شہری صدام حسین کا کہنا ہے کہ ایک کنسٹرکشن کمپنی میں مزدوری کرتے ہیں، کمپنی کی جانب سے میرا اسٹیٹس تبدیل نہیں کیا جارہا اور مجھے ایک ماہ کی تنخواہ بھی نہیں دی گئی ہے، میں تین ماہ سے غیرقانونی طور پر رہائش پذیر ہوں مجھے بغیر کسی جرمانے کے بھارت واپس جانے دیا جائے۔
واضح رہے کہ اس اسکیم سے قانونی طریقے سے جانے والے افراد ہی فائدہ اٹھاسکیں گے غیرقانونی طریقے سے داخل ہونے والوں کو بغیر کسی جرمانے کے واپس بھیج دیا جائے گا اور وہ آئندہ دو سال تک واپس نہیں جاسکیں گے۔
پاکستانیوں کے لیے ابوظہبی سفارت خانے اور قونصل خانوں میں ہیلپ لائن سینٹر قائم کردیے گئے ہیں، تاکہ زیادہ سے زیادہ افراد مستفید ہوسکیں۔
