لاہور: وزیراعلیٰ پنجاب سردار عثمان بزدار کا کہنا ہے کہ کسی بھی گینگ یا گروہ کو لاقانونیت یا دہشت پھیلانے کی ہرگز اجازت نہیں، قانون کی عمل داری کے لئے آخری حد تک جائیں گے۔
تفصیلات کے مطابق وزیراعلیٰ پنجاب کی جانب سے یہ بیان سی ٹی ڈی کے ہاتھوں سرغنہ لادی گینگ کی ہلاکت کے بعد جاری کیا گیا، عثمان بزدار نے کہا کہ سفاک قاتل کوجہنم واصل کرنے والےافسرواہلکار قوم کےہیرو ہیں، قوم کو سی ٹی ڈی اور پنجاب پولیس کے بہادر سپوتوں پر نازہے۔
وزیراعلیٰ پنجاب نے کہا کہ درندےکا عبرتناک انجام واضح پیغام ہےکہ ایسےہر گینگ کا قلع قمع کیاجائےگا، لاقانونیت،دہشت پھیلانےوالے ہر گینگ کا ایسا ہی عبرتناک انجام ہوگا۔
عثمان بزدار نے کہا کہ پنجاب حکومت عوام کے جان و مال کے تحفظ کیلئےہر ممکن اقدام کریگی، کسی بھی گینگ یاگروہ کو لاقانونیت یادہشت پھیلانے کی ہرگز اجازت نہیں، قانون کی عمل داری کے لئے آخری حد تک جائیں گے۔
گذشتہ روز ڈی جی خان کے ضلعی پولیس آفیسر فیصل رانا نے بتایا کہ تھانہ کوٹ مبارک کے علاقے میں ہونے والے پولیس مقابلے میں لادی گینگ کا سرغنہ خدا بخش عرف حدی مارا گیاہے۔
یہ بھی پڑھیں: لادی گینگ کا سرغنہ پولیس مقابلے میں ہلاک
فیصل رانا کے مطابق ملزم قتل اور پولیس مقابلے کی وارداتوں میں مطلوب تھا، ملزم نے ایک شخص کو قتل کرکے ویڈیو سوشل میڈیا پر وائرل کی، جس پر وزیر اعظم اور وزیر اعلی پنجاب نے گینگ کیخلاف آپریشن کا حکم دیا تھا۔
دوسری جانب انسداد دہشت گردی فورس پنجاب نے بھی لادی کینگ کے مرکزی ملزم کو ہلاک کرنے کی تصدیق کی اور بتایا کہ خدا بخش کو آپریشن کے دوران ہلاک کیا گیا۔
