بانی پاکستان تحریک انصاف اور ان کی اہلیہ بشریٰ بی بی پر 190 ملین پاؤنڈز ریفرنس میں آج بھی فرد جرم عائد نہ ہو سکی جس کے باعث کارروائی مؤخر کر دی گئی۔
اڈیالہ جیل میں بانی پی ٹی آئی اور بشریٰ بی بی کے خلاف 190 ملین پاؤنڈز ریفرنس کی سماعت احتساب عدالت کے جج محمد بشیر نے کی۔
بانی پی ٹی آئی کو عدالت میں پیش کیا گیا تاہم ان کی اہلیہ پیش نہ ہوئیں۔ بشریٰ بی بی کی عدالت میں آج حاضری سے استثنیٰ کی درخواست دائر کی گئی جسے عدالت نے منظور کیا۔
نیب ڈپٹی پراسیکیوٹر جنرل سردار مظفر عباسی، امجد پرویز اور عرفان بھولا عدالت میں پیش ہوئے جبکہ ملزمان کی جانب سے لطیف کھوسہ، شعیب شاہین، شہباز کھوسہ اور بیرسٹر گوہر خان پیش ہوئے۔
شعیب شاہین نے کہا کہ 190 ملین پاؤنڈز ریفرنس سے متعلق درخواست ہائیکورٹ میں زیر التوا ہے، آج درخواست غلطی سے سنگل بینچ کے پاس مقرر تھی سماعت نہ ہو سکی۔
انہوں نے کہا کہ کل اسلام آباد ہائیکورٹ کا ڈویژن بینچ سماعت کرے گا لہٰذا گزارش ہے 190 ملین پاؤنڈز ریفرنس کی سماعت ملتوی کی جائے، کل ڈویژن بینچ میں ساڑھے 12 یا ایک بجے تک سماعت ہوگی۔
اس پر احتساب عدالت نے فرد جرم کی کارروائی مؤخر کرتے ہوئے سماعت ملتوی کر دی۔