The news is by your side.

Advertisement

امریکا میں عجیب الخلقت کچھوے کی پیدائش

میساچوسٹس: امریکا میں ایسے عجیب الخلقت کچھوے کی پیدائش ہوئی ہے، جس کے دو سر ہیں۔

تفصیلات کے مطابق امریکی ریاست میساچوسٹس میں دو ہفتے قبل دو سروں والا کچھوا پیدا ہوا ہے، یہ کچھوا ایک وقت میں ایک ہی سر پانی سے باہر نکالتا ہے، جب کہ دوسرا سر پانی ہی میں ہوتا ہے، ماہرین اس کچھوے پر تحقیقات کر رہے ہیں۔

برڈزی کیپ وائلڈ لائف سینٹر میں موجود یہ کچھوا اپنی نوعیت کی کمیاب نسل سے تعلق رکھتا ہے، جنگلی حیات کے مرکز میں اس کچھوے کو خوراک میں سرخ کیڑے اور خاص قسم کی خوراک والی گولیاں (فوڈ پیلٹس) دی جا رہی ہیں۔

ماہرین کا کہنا ہے کہ اس کے دونوں سر الگ الگ کام کرتے ہیں، کیوں کہ یہ کچھوا ہوا کے لیے ایک وقت میں ایک ہی سر پانی سے اوپر نکالتا ہے۔

صرف یہی نہیں، کچھوے کے خول کے اندر معدے کے دو نظام ہیں، جو اس کے جسم کے دونوں حصوں کو خوراک پہنچاتے ہیں۔

ماہرین کا کہنا ہے کہ دراصل یہ ایک نہیں بلکہ دو جڑواں کچھوے ہیں، یہ ایک نایاب صورت حال ہے، جو جنین کی نشوونما کے دوران جینیاتی یا ماحولیاتی دونوں عوامل کی وجہ سے ہو سکتی ہے۔

انسانوں میں جڑواں بچوں کی طرح ، یہ کچھوے بھی اپنے جسم کے کچھ حصوں میں ایک دوسرے کے شریک ہیں لیکن کچھ حصے ایسے بھی ہیں جو ایک دوسرے سے الگ اور آزاد ہیں۔

ان جڑواں بے بی ٹرٹلز کے 2 سر اور 6 ٹانگیں ہیں (کچھوے کی 4 ٹانگیں ہوتی ہیں)، ایکس رے اور ٹیسٹوں سے پتا چلتا ہے کہ ان میں 2 ریڑھ کی ہڈیاں ہیں، جو جسم میں نیچے جا کر آپس میں مل جاتی ہیں، اور معدے کے راستوں کو الگ کرتی ہیں۔

اچھی طرح سے جانچ کے بعد کیپ وائلڈ لائف سینٹر کی ویٹرنری ٹیم نے دونوں کچھووں کو بہت چوکس اور متحرک پایا، ٹیم اس کچھوے کا سی ٹی اسکین کر کے مزید معلومات حاصل کرے گی۔

اس کچھوے کا تعلق میساچوسٹس میں سمندر کے قریب واقع گاؤں ویسٹ بارن سٹیبل سے ہے، محققین کا کہنا ہے کہ وہ مقام کچھوے کے لیے خطرناک تھا اسی لیے اس کو وہاں سے منتقل کیا گیا۔

سینٹر میں موجود جانوروں کی ڈاکٹر پریا پٹیل اور دیگر عملہ اس کچھوے کا معائنہ کر رہا ہے، انھوں نے اس کے دو نام رکھے ہیں، ایک میری کیٹ اور دوسرا نام ایشلی اولسن ہے، جو کہ دو مشہور جڑواں فیشن ڈیزائنر اور سابقہ اداکار بہنوں کے نام ہیں۔

Comments

یہ بھی پڑھیں