دبئی: متحدہ عرب امارات کی ریاست راس الخیمہ میں ٹریفک حادثے کے نتیجے میں 2 افراد ہلاک اور 31 زخمی ہوگئے۔
عرب میڈیا کے مطابق متحدہ عرب امارات کی ریاست راس الخیمہ میں محمد بن زید روڈ پر مسافر بس حادثے کا شکار ہوگئی، جس کے نتیجے میں 2 ایشیائی باشندے ہلاک اور 31 زخمی ہوگئے۔
راس الخیمہ پولیس کے مطابق حادثے کی اطلاع ملتے ہی ریسکیو ٹیمیں اور ایمبولینس جائے وقوعہ پر پہنچیں اور ہلاک و زخمیوں کو قریبی اسپتال منتقل کیا۔
پولیس کے مطابق حادثہ اوور ٹیکنگ کے دوران پیش آیا، 6 زخمیوں کی حالت تشویش ناک ہے جبکہ دیگر زخمی افراد کو معمولی چوٹیں آئی ہیں جنہیں طبی امداد دی جارہی ہے۔
رپورٹ کے مطابق گزشتہ روز راس الخیمہ پولیس کی جانب سے ڈرائیورز کو وارننگ جاری کی گئی تھی کہ وہ شیخ بن زید روڈ پر اسپیڈ لمٹ کا خیال رکھیں۔
مزید پڑھیں: دبئی میں خوفناک ٹریفک حادثہ، دو پاکستانی سمیت 17 ہلاک
سرکاری ریکارڈ کے مطابق متحدہ عرب امارات میں ہونے والے زیادہ تر حادثات تیز رفتاری، ڈرائیورز کی غفلت اور حفاظتی فاصلے کو نظر انداز کرنے کی وجہ سے پیش آتے ہیں۔
واضح رہے کہ گزشتہ ماہ 8 جون کو دبئی میں خوفناک ٹریفک حادثے میں 2 پاکستانی شہریوں سمیت 17 افراد ہلاک ہوگئے تھے، حادثہ تیز رفتاری کے سبب پیش آیا تھا۔
اس سے قبل اماراتی دارالحکومت ابوظبی کے ضلع الفلاح میں عید کے پہلے روز خوفناک ٹریفک حادثے کے نتیجے میں تین بچے اور خاتون جاں بحق ہوگئی تھی۔
یاد رہے رواں سال مارچ میں راس الخیمہ میں ٹریفک حادثے کے نتیجے میں 3 اماراتی اور ایک اور ایشیائی نوجوان ہلاک ہوگیا تھا۔
