سندھ پولیس میں 22 ہزار بھرتیاں فوج کی زیر نگرانی کرانے کا فیصلہ -
The news is by your side.

Advertisement

سندھ پولیس میں 22 ہزار بھرتیاں فوج کی زیر نگرانی کرانے کا فیصلہ

کراچی: وزیر داخلہ چوہدری نثار نے کہا ہے کہ دہشت گردی کے خلاف سندھ پولیس میں 22 ہزار بھرتیاں کی جائیں گی،بھرتی کا عمل فوج کی زیر نگرانی میں ہوگا،بھتے کے لیے دو اسلامی ممالک سے بھی کالز آرہی ہیں، آزادکشمیر کے الیکشن والے دن فوج تعینات کی جائے گی۔

کراچی میں پریس کانفرنس کرتے ہوئے وفاقی وزیر داخلہ چوہدری نثار علی خان کا کہنا تھا کہ ہم دہشت گردی کے خلاف جنگ جیت رہے ہیں، لیکن ہمیں نفسیاتی جنگ بھی جیتنی ہے،امن و امان کی مجموعی صورتحال میں بہتر ی آئی ہے ،ایک دو واقعات سے قوم کو مایوس نہیں ہونا چاہیے۔

چوہدری نثار کا کہنا ہے کہ امجد صابری کا قتل اور اویس شاہ اغوا کیس سیکیورٹی اداروں کے لیے چیلنج ہیں جسے سیکیورٹی اداروں نے قبول کیا، جلد ذمہ داروں کے گرد شکنجہ کس دیا جائے گا، دہشت گردی کے خلاف جنگ کے ساتھ نفسیاتی جنگ بھی جیتنی ہوگی۔

وفاقی وزیر داخلہ نے بتایا سندھ پولیس میں بیس ہزار اہلکار اور دو ہزار سابق فوجی بھرتی کیے جائیں گے جن کی بھرتی اور تربیت آرمی کے زیر نگرانی ہوگی جبکہ اسلام آباد کے سیف سٹی ماڈل کو کراچی میں بھی استعمال کیا جائے گا۔

وزیر داخلہ چوہدری نثار نے عوام سے اپیل کی ہے کہ وہ افواہوں پر کان نہ دھریں، سوشل میڈیا کا مثبت استعمال اور منفی پروپگینڈے سے گریز کیا جائے۔

انہوں نے کہا ہے کہ امجد صابری قتل کیس میں افواہیں پھیلائی جارہی ہیں، تفتیش کسی سیاسی جماعت کی طرف جانےکی خبروں میں کوئی صداقت نہیں سوشل میڈیا پرجھوٹی خبریں پھیلانے والےبہت نقصان پہنچا رہے ہیں امجدصابری کے قاتلوں تک پہنچیں گے۔

چوہدری نثار کا کہنا ہے اقتصادی راہداری جتنی پاکستان کے لیے اہم ہے اتنی ہی یہ پاکستان دشمنوں کے لیے اہم نشانہ ہے، شواہد ملے ہیں کہ ہمارے اپنے بھی کچھ لوگ آلہ کار بنے ہوئے ہیں۔

چوہدری نثار نے بتایا کچھ ’اپنے لوگ‘بھی دشمنوں کے آلہ کار بنے ہوئے ہیں، ان کے سد باب کے لیے بھی کچھ کرنا ہوگا،غیر ملکی جاسوسوں کا پکڑے جانا اس بات کا ثبوت ہے کہ ہماری ایجنسیاں ہر دم تیار ہیں، جرائم کے خلاف فیڈرل کرائم ڈیٹا بیس بنانے کا فیصلہ کرلیا اس معاملے کو قانونی شکل دی جارہی ہے۔

بھتہ خوری کے معاملے پر انہوں نے کہا کہ بھتے کے لیے دو اسلامی ممالک سے بھی کالز آرہی ہیں، بھتہ خوری کی زیادہ تر کالز بیشتر کالم بیرون ممالک سے آتی ہیں، جرائم کے معاملے میں کراچی میں 132 ویں نمبر پر آگیا ہے ۔

انہوں نے کہا کہ ہر شخص کو سیکیورٹی دینا حکومت کی ذمہ داری ہے،دہشت گردی کے خلاف جنگ میں علما بھی متحرک ہو کر اپنا کردار ادا کریں۔

چوہدری نثار کا مزید کہنا تھا کہ آزاد کشمیر کے الیکشن والے سیکیورٹی کے لیے پولنگ بوتھ پر فوج تعینات کی جائے گی۔

Comments

comments

یہ بھی پڑھیں