کراچی: شہر قائد کے علاقے گلشن اقبال میں مسکن چورنگی کے قریب دھماکا ہوا ہے، جس سے عمارت کا ایک حصہ منہدم ہو گیا، واقعے میں 23 افراد زخمی جب کہ 5 افراد جاں بحق ہو گئے۔
تفصیلات کے مطابق گلشن اقبال ابوالاصفہانی روڈ کے قریب ایک عمارت میں دھماکے سے 4 منزلہ عمارت کی پہلی اور دوسری منزل منہدم ہو گئی۔
اے آر وائی نیوز کے مطابق جس علاقے میں دھماکا ہوا ہے وہ رہائشی علاقہ ہے، دھماکے سے عمارت کے ایک حصے میں 2 منزلیں اور 2 دکانیں منہدم ہو چکی ہیں، امدادی ٹیموں نے ملبے سے زخمیوں کو نکالنےکا آپریشن مکمل کر لیا ہے، دھماکے سے 3گاڑیاں اور 6 موٹر سائیکلوں کو نقصان پہنچا۔
دھماکے کی شدت سے بینک کی کرسیاں اور موٹر سائیکلیں دوسری سڑک پر اڑ کر جا گری تھیں، دیواروں کا ملبہ بھی دور تک گرا ، بینک کا سامان باہر گرنے سے معلوم ہو رہا ہے کہ دھماکا بینک کے اندر ہی ہوا ہے۔
حادثے کے زخمیوں میں ٹریفک اہل کار بھی شامل ہے جو شدید زخمی ہو گیا ہے، ٹریفک پولیس اہل کار بینک کے باہر ٹریفک کلیئر کرتے ہوئے زخمی ہوا۔
کراچی : مسکن چورنگی دھماکا کیسے ہوا؟ وجوہات سامنے آگئیں
وزیر اعلیٰ سندھ سید مراد علی شاہ نے مسکن چورنگی دھماکے کا نوٹس لیتے ہوئے کمشنر کراچی سے واقعے کی تفصیلی رپورٹ طلب کر لی ہے۔
بم ڈسپوزل اسکواڈ کو بھی طلب کیا گیا، دھماکے کی آواز اتنی زور دار تھی کہ دور دور تک سنی گئی، قریبی عمارتوں کے شیشے بھی ٹوٹ گئے، دھماکے کے بعد لوگوں میں بھگدڑ مچ گئی۔
دھماکے کی نوعیت کا تعین ابھی تک نہیں ہو سکا ہے، کمشنر کراچی کا کہنا ہے کہ بظاہر یہ گیس سلنڈر کا دھماکا معلوم ہوتا ہے، ان کا کہنا تھا کہ متعلقہ عمارت خطرناک ہوگئی ہے، اسےگرایا جائے گا۔
