برسلز: اراکین یورپی پارلیمنٹ نے کشمیری رہنماؤں، انسانی حقوق کے کارکنوں اور صحافیوں کی رہائی کا مطالبہ کردیا۔
تفصیلات کے مطابق یورپی پارلیمنٹ کے 21 ممبران نے نریندرمودی سمیت بھارتی اعلیٰ حکام کو خط لکھا ، جس میں کہا ہے کہ بے گناہ حراست میں لیے گئے افراد کو فوری رہا کیا جائے۔
اراکین یورپی پارلیمنٹ کا کہنا تھا کہ خرم پرویز اور دیگر اسیران کی گرفتاری کی مذمت کرتے ہیں، یورپی یونین کے رہنما اصولوں اور خطوط پر عمل کرتے ہیں۔
خط کے متن میں کہا گیا کہ آئندہ یورپی پارلیمنٹ اجلاس میں گھمبیر صورتحال پربحث کی درخواست کریں گے ، نئی دہلی یو این جنرل اسمبلی کی پاس قراردادوں کی مکمل پاسداری کرے۔
یاد رہے کشمیرکونسل ای یو کے چیئرمین علی رضا سید نے یورپی یونین سے مطالبہ کیا تھا کہ انسانی حقوق کے عالمی شہرت یافتہ علمبردار خرم پرویز اور انسانی حقوق کے دیگر کارکنوں، سیاسی رہنماؤں اور صحافیوں کی رہائی کے لیے اپنا مؤثر کردار ادا کرے۔
علی رضا سید نے یورپی پارلیمنٹ کے 21 ممبران کے وزیر اعظم نریندر مودی سمیت بھارتی اعلیٰ حکام کو لکھے گئے کھلے خط کو بھی سراہا۔
