برلن: جرمنی کے شہر ووپرٹال میں دھماکے سے ایک عمارت تباہ ہوگئی جس کے نتیجے میں 25 افراد زخمی ہوگئے، چار زخمیوں کی حالت تشویشناک ہے۔
غیر ملکی خبر رساں ادارے کے مطابق جرمنی کے مغربی شہر ووپرٹال میں زوردار دھماکے سے عمارت تباہ ہوگئی، جس کے نتیجے میں 25 افراد زخمی ہوگئے، پولیس نے تحقیقات کا آغاز کردیا۔
پولیس کے مطابق دھماکے کی آواز دور تک سنی گئی، اطلاع ملنے پر ریسیکیو ادارے اور فائر فائٹرز نے موقع پر پہنچ کر ملبے میں دبے افراد کو نکال کر اسپتال منتقل کیا۔
اسپتال انتظامیہ کے مطابق 25 زخمیوں میں سے 4 کی حالت تشویشناک ہے جبکہ فائر فائٹرز نے کئی گھنٹوں کی جدوجہد کے بعد دھماکے کے نتیجے میں لگنے والی آگ پر قابو پالیا اور امدادی کارروائی مکمل کرلی گئی ہیں۔
پولیس کے مطابق دھماکے کی نوعیت کے حوالے سے کچھ بھی کہنا قبل ازوقت ہوگا، جائے وقوعہ کو سیل کردیا گیا ہے تاہم پولیس نے ابتدائی شواہد اکٹھے کرکے تحقیقات کا آغاز کردیا ہے۔
دھماکے کے نتیجے میں عمارت کے قریب کھڑی گاڑیاں بھی تباہ ہوگئیں جبکہ قریبی عمارتوں میں رہائش پذیر افراد کو بھی محفوظ مقام پر منتقل کردیا گیا ہے۔
