دبئی: متحدہ عرب امارات میں ایک خاتون 25 سال بعد بھائیوں سے ملنے پر آبدیدہ ہوگئی۔
اماراتی میڈیا کے مطابق ریاست ام القوین کی رہائشی خاتون جانتی تھی کہ اس کے بھائی بھی ہیں لیکن وہ زندگی میں کبھی ان سے نہیں ملی، یہاں تک کہ اسے معلوم ہی نہیں تھا کہ بھائی دیکھنے میں کیسے لگتے ہیں۔
خاتون نے پولیس کے سوشل سپورٹ سینٹر سے رجوع کر کے معاملے سے آگاہ کیا اور وہ بھائیوں کے شناختی دستاویزات لینے دفتر پہنچی تو ڈاکومنٹس میں تصاویر دیکھ کر رونے لگی۔
خاتون نے کہا کہ اس نے آج تک بھائیوں کی شکل نہیں دیکھی تھی کیونکہ والد نے بہت پہلے والدہ کو طلاق دے دی تھی، بس اتنا معلوم تھا کہ میرے بھائی بھی ہیں جنہیں میں جانتی نہیں۔
خاتون کی درخواست پر سوشل ورکر نے بھائیوں کی تلاش شروع کی تو وہ کسی طرح والدہ تک پہنچ گئی جس نے اجازت دی کہ خاتون اپنے بھائیوں سے ملاقات کر سکتی ہے۔
سوشل ورکر کا کہنا ہے کہ خاتون کو والدہ کے گھر پر بھائیوں سے ملاوایا گیا تو وہ زار و قطار رونے لگی، خاتون نے زندگی میں پہلی بار بھائیوں سے ملاقات کی تھی اور ان مناظر نے دلوں کو موم کردیا تھا۔
