چٹاگانگ: پاکستانی بیٹرز عابد علی کی ٹیسٹ کرکٹ میں عمدہ کارکردگی کا سلسلہ جاری ہے، بیٹر نے بنگلا دیش کے خلاف سینچری جڑ دی ہے۔
تفصیلات کے مطابق بنگلا دیش کے خلاف چٹاکانگ ٹیسٹ کے تیسرے روز پاکستانی اوپنر عابد علی نے شاندار کھیل کا مظاہرہ کیا اور جم کر بنگلہ دیش بولرز کے خلاف مزاحمت کی۔
عابد علی نے پہلے پہل بیٹر عبداللہ شفیق کے ساتھ 146 رنز کی اوپننگ شراکت داری کرتے ہوئے قومی ٹیم کو عمدہ آغاز فراہم کیا، بعد ازاں بنگلا دیش کے خلاف سینچری جڑ ڈالی، ان کی شاندار اننگز میں 9 چوکے اور 2 چھکے بھی شامل ہیں، عابد علی اس وقت 112 رنز کے ساتھ کریز پر موجود ہیں۔
بنگلا دیش کے خلاف سینچری بنانے پر آئی سی سی نے بھی انہیں خراج تحسین پیش کیا ہے۔
Fourth Test century for Abid Ali!
Well deserved 👏#WTC23 | #BANvPAK | https://t.co/hbmOHb7hh4 pic.twitter.com/XZr52fAyUS
— ICC (@ICC) November 28, 2021
واضح رہے کہ عابد علی انٹرنیشنل کرکٹ میں آتے ہی تاریخ ساز بلے باز بن چکے ہیں، وہ دنیا کے پہلے بلے باز ہیں جنھوں نے اپنے اولین ون ڈے انٹرنیشنل اور ٹیسٹ میچ میں سنچری اسکور کی ہے۔
عابد علی ابتدائی 2 ٹیسٹ میچ میں سنچری بنانے والے پہلے پاکستانی کرکٹر ہونے کا اعزاز رکھتے ہیں، اسی اعزاز کے باعث وہ دنیا کے نویں کرکٹر بنے تھے جنہوں نے اپنے دو ابتدائی ٹیسٹوں میں سینچریاں اسکور کیں۔
عابدعلی 2007 سے فرسٹ کلاس کرکٹ کھیل رہے ہیں اور اس عرصے میں وہ بیس سنچریاں اسکور کر چکے ہیں جن میں چار ڈبل سنچریاں بھی شامل ہیں۔
