واشنگٹن: ایک سینئر امریکی جنرل نے انکشاف کیا ہے کہ سابق امریکی صدر ڈونلڈ ٹرمپ کے دور میں 3 مبینہ چینی جاسوس غبارے امریکا آئے تھے۔
روئٹرز کے مطابق ایک سینئر امریکی جنرل گلین وان ہرک نے ماضی میں جاسوس غباروں کا سراغ لگانے میں ناکامی کا اعتراف کرتے ہوئے کہا کہ ’’ٹرمپ کے دور حکومت میں کم از کم تین مرتبہ چینی جاسوس غبارے امریکی فضائی حدود میں منڈلاتے رہے۔‘‘
چین کے مبینہ جاسوس غبارے کو مار گرانے والے امریکی جنرل نے کہا کہ حالیہ جاسوس غبارہ 200 فٹ (60 میٹر) لمبا تھا اور اس کے نیچے موجود پے لوڈ کا وزن 2 ہزار پاؤنڈ تھا۔
یہ بات بھی سامنے آئی ہے کہ اعلیٰ امریکی حکام کی جانب سے سابق صدر کی انتظامیہ کو گزشتہ جاسوس غباروں کے بارے میں تفصیل فراہم کرنے کی پیش کش کی گئی ہے۔
غبارہ مار گرانے کی ویڈیوز وائرل، چین کا سخت رد عمل
جنرل وان ہرک نے کہا کہ غبارے کا ملبہ اکٹھا کر لیا گیا ہے، تاہم انھوں نے یہ نہیں کہا کہ اس جاسوس غبارے میں دھماکہ خیز مواد موجود تھا یا نہیں۔ یاد رہے کہ امریکا نے ہفتے کو کیرولائنا کے ساحل کے قریب چینی غبارے کو مار گرایا تھا۔
دوسری طرف ایوان نمائندگان کے انٹیلیجنس کمیٹی کے رکن مائیکل والٹز نے اتوار کو کہا کہ پینٹاگون نے انھیں بتایا ہے کہ حالیہ برسوں میں متعدد چینی جاسوس غبارے فلوریڈا سمیت امریکی حدود میں منڈلاتے دیکھے گئے ہیں۔
