یوکرین میں کورونا سے مرنے والوں کی یاد میں منعقدہ تقریب خوفناک حادثے کا سبب بن گئی۔
بین الاقوامی میڈیا رپورٹس کے مطابق یوکرین کے ایک اسپتال میں کورونا سے مرنے والوں کی یاد میں تقریب جاری تھی کہ اس دوران اچانک آگ لگنے کی وجہ سے کم از کم 3 افراد ہلاک اور 4 شدید جھلس گئے۔
تقریب میں عملے کا ایک رکن ہاتھ میں موم بتی اٹھائے کھڑا تھا کہ اس دوران آکسیجن مشینوں میں آگ بھڑک اٹھی جس نے دیکھتے ہی دیکھتے وارڈ کو اپنی لپیٹ میں لے لیا۔
حکام کا کہنا ہے کہ آتشزدگی کے نتیجے میں انتہائی نگہداشت وارڈ میں زیرعلاج 3 افراد موت کے منہ میں چلے گئے جب کہ 4 شدید جھلس گئے جن کی حالت تشویشناک ہے۔
کورونا وبا کے دوران اسپتال میں آتشزدگی کا یہ کوئی پہلا واقعہ نہیں، عملے کی لاپرواہی یا لوگوں کی غفلت کی وجہ سے ایسے کئی واقعات رونما ہو چکے ہیں۔
چونکہ کورونا مریضوں کی جان بچانے کے لیے وارڈز میں آکسیجن سلینڈرز پوری طرح بھرے ہوتے ہیں اس لیے ذرا سی بھی غلطی بڑھے حادثے کی وجہ بن جاتی ہے۔