کھٹمنڈو: نیپال کے ایئرپورٹ پر چھوٹا طیارہ اڑان بھرنے کے دوران رن وے کے قریب کھڑے دو ہیلی کاپٹروں سے ٹکرا گیا جس کے نتیجے میں 3 افراد ہلاک اور 4 زخمی ہوگئے۔
غیرملکہ خبررساں ادارے کے مطابق نیپال کے ایئرپورٹ پر چھوٹا طیارہ اڑان بھرتے ہی رن وے کے قریب کھڑے دو ہیلی کاپٹروں سے ٹکرا گیا جس کے نتیجے میں 3 افراد ہلاک اور 4 زخمی ہوگئے، ہلاک و زخمیوں کو فوری طور پر اسپتال منتقل کیا گیا۔
طیارے کا حادثہ نیپال کے ماؤنٹ ایورسٹ پہاڑی کے قریب واقع لکلا ایئرپورٹ پر پیش آیا جسے طیاروں کے اڑان بھرنے اور لینڈنگ کے اعتبار سے دنیا کا خطرناک ترین ایئرپورٹ کہا جاتا ہے۔
ایئرپورٹ حکام کے مطابق سمٹ ایئر کا طیارہ ایل ای ٹی 410 اڑان بھرنے کے دوران رن وے سے پھسل کر قریب کھڑے دو ہیلی کاپٹروں سے ٹکرایا، ہلاک ہونے والوں میں معاون پائلٹ اور دو پولیس اہلکار شامل ہیں۔
مزید پڑھیں: ایتھوپین ایئرلائن کا مسافر بردار طیارہ حادثے کا شکار، 157 مسافر ہلاک
حادثے میں زخمی ہونے والے 4 افراد کو کھٹمنڈو اسپتال میں طبی امداد دی جارہی ہے جبکہ دو زخمیوں کی حالت تشویش ناک بتائی گئی ہے۔
ایئرپورٹ حکام کا کہنا ہے کہ حادثے کی وجوہات سے متعلق ابھی کچھ نہیں کہا جاسکتا، تحقیقات کے بعد ہی حادثے کی وجوہات سامنے آسکیں گی۔
واضح رہے کہ سیکڑوں سیاح دنیا کی بلند ترین چوٹی ماؤنٹ ایورسٹ سر کرنے کے لیے لکلا ایئرپورٹ سے ہی روانہ ہوتے ہیں، موسم بہار میں سیاحوں کی بڑی تعداد ماؤنٹ ایورسٹ سر کرنے لیے لکلا ایئرپورٹ پہنچتی ہے۔
یاد رہے کہ رواں سال فروری میں خراب موسم کے سبب ایک ہیلی کاپٹر حادثے کا شکار ہوا تھا جس کے نتیجے میں وزیر سیاحت سمیت 7 افراد ہلاک ہوگئے تھے۔
