واشنگٹن: امریکی ریاست پنسلوانیا میں چھوٹا طیارہ رہائشی عمارت کے لان میں گر کر تباہ ہوگیا جس کے نتیجے میں 3 افراد ہلاک ہوگئے۔
غیرملکی خبررساں ادارے کے مطابق امریکی ریاست پنسلوانیا میں ایک چھوٹا طیارہ رہائشی عمارت کے لان میں گر کر تباہ ہوگیا، حادثے کے نتیجے میں طیارے میں سوار تینوں افراد ہلاک ہوگئے۔
رپورٹ کے مطابق طیارہ صبح 6 بجکر 20 منٹ پر گر کر تباہ ہوا تاہم یہ واضح نہیں ہوسکا ہے کہ طیارے کی آخری منزل کون سی تھی۔
اپرمورلینڈ پولیس چیف کا کہنا ہے کہ ہلاک ہونے والے ایک ہی خاندان کے افراد ہیں جن میں 60 سالہ شوہر، 54 سالہ اہلیہ اور 19 سالہ بیٹی شامل ہیں۔
مزید پڑھیں: امریکا میں مسافر طیارہ گرکر تباہ، 10 افراد ہلاک
حادثے کی وجوہات کے تعین کے لیے انکوائری کمیٹی تشکیل دے دی گئی ہے، طیارے کے ملبے کو ریسیکیو اہلکاروں کی جانب سے ہٹا دیا گیا ہے۔
واضح رہے کہ گزشتہ ماہ امریکی ریاست ٹیکساس میں مسافر طیارہ گر کر تباہ ہوگیا تھا جس کے نتیجے میں 10 افراد ہلاک ہوگئے تھے۔
یاد رہے کہ رواں سال اپریل میں امریکی ریاست ٹیکساس میں ڈبل انجن طیارہ گر کر تباہ ہونے کے نتیجے میں 6 افراد ہلاک ہوگئے تھے، ہلاک ہونے والوں میں نیویارک کے سابق میئر اور ان کی نواسی بھی شامل تھیں۔
