The news is by your side.

Advertisement

پاکستان میں کورونا وائرس نے مزید بچوں کو اپنی لیپٹ میں لے لیا

لاہور: کورونا کی تیسری لہر سے بچے تیزی سے  متاثر ہورہے ہیں، لاہور میں مزید 3 بچوں میں کورونا کی تصدیق ہوگئی۔

تفصیلات کے مطابق لاہورمیں کورونا وائرس نے مزید تین بچوں کو اپنی لیپٹ میں لے لیا ہے، جن میں سے دو بچوں کو چلڈرن اسپتال میں داخل کرایا گیا ہے ، جس کے بعد چلڈرن اسپتال میں متاثرہ بچوں کی تعداد چودہ ہوگئی۔

اسپتال انتظامیہ کاکہنا ہے کہ چھ بچوں کوڈسچارج کردیاہے اور آٹھ بچےزیرعلاج ہیں تاہم تمام کورونا سے متاثرہ بچوں کی حالت خطرے سے باہر ہے۔

یاد رہے دو روز قبل لاہور چلڈرن اسپتال میں کورونا کا شکار دو بچے دم توڑ گئے تھے، جاں بحق ہونے والا ایک بچہ دل کے عارضہ جبکہ دوسرا گردن توڑ بخار میں مبتلا تھا۔

ڈین چلڈرن اسپتال کا کہنا تھا کہ کرونا کی تیسری لہر سے بچے بھی بہت زیادہ متاثر ہو رہے ہیں، عوام سے گذارش ہے کہ اپنے بچوں کا خیال رکھیں۔

خیال رہے وفاقی وزارت صحت کے مطابق ملک بھر میں اب تک مجموعی طور پر دس سال کی عمر کے بیس ہزارسے زائد بچے کورونا سے متاثر ہوچکے ہیں ۔

Comments

یہ بھی پڑھیں