راولپنڈی: سیکیورٹی فورسز کے شمالی وزیرستان میں انٹیلی جنس بیسڈ آپریشن کے دوران حافظ گل بہادر گروپ کے اہم کمانڈر سمیت 2 دہشت گرد مارے گئے۔
تفصیلات کے مطابق پاک فوج کے شعبہ تعلقات عامہ ( آئی ایس پی آر) کی جانب سے بیان میں کہا گیا ہے کہ سیکیورٹی فورسز نے شمالی وزیرستان میرعلی میں انٹیلی جنس کی بنیاد پر آپریشن کیا۔
آئی ایس پی آر نے کہا کہ دوران آپریشن فورسز اور دہشت گردوں میں شدید فائرنگ کا تبادلہ ہوا اور فائرنگ کے تبادلے میں حافظ گل بہادر گروپ کے دہشت گرد کمانڈر خبیب عرف بلال سمیت 2 دہشت گرد ہلاک ہوگئے۔
آئی ایس پی آر نے بتایا ہلاک دہشت گردوں سے اسلحہ اور گولہ بارود بھی برآمد ہوا۔
ترجمان کا کہنا تھا کہ ہلاک دہشت گرد سیکیورٹی فورسز کے خلاف دہشت گردی کی کارروائیوں میں ملوث رہے جبکہ آئی ای ڈیز کی تیاری اور معصوم شہریوں کے قتل میں بھی سرگرم تھے۔
آئی ایس پی آر کے مطابق خبیب رواں ماہ میر علی میں سیکیورٹی فورسز کے قافلے پر خودکش حملے میں بھی ملوث تھا۔
