لاہور : مینارپاکستان کیس میں مزید 34ملزمان کوگرفتار کرلیا گیا ، جس کے بعد کیس میں کل126 گرفتاریاں ہو چکی ہیں ، آئی جی پنجاب نے دیگرملزمان کی گرفتاری کیلئے پولیس کو مزید متحرک کرنے کی ہدایت کردی ہے۔
تفصیلات کے مطابق پنجاب پولیس نے مینار پاکستان پرخاتون سےدست درازی کے معاملے میں مختلف اضلاع سے مزید 34 ملزمان کو گرفتار کرلیا ، واقعہ کے حوالے سے گرفتار افراد کی تعداد 126 ہوگئی۔
گرفتار ملزمان میں سے مزید 15 کوآج شناخت پریڈ کیلئےبھجوایاجائے گا جب کہ آئی جی پنجاب نے دیگرملزمان کی گرفتاری کیلئے پولیس کو مزید متحرک کرنے کی ہدایت کرتے ہوئے کہا ہے کہ ملزمان کو جلد از جلد گرفتار کیا جائے اور ملوث ملزمان کو سخت سزا دلوانے میں کوئی کسر نہ اٹھا رکھی جائے۔
دوسری جانب تفتیشی حکام نے مینار پاکستان پر خاتون سے دست درازی کے واقعے سے متعلق 320 ویڈیوز اور 60 تصاویر اکٹھی کرکے نادرا کو شناخت کےلیے بھجوا دیں، جس کے ذریعے نادرا نے 9 افراد کی شناخت کیں۔
خیال رہے 14 اگست کو یوم آزادی کے موقع پر مینار پاکستان جانے والی ٹک ٹاکر عائشہ اکرم کو سیکڑوں افراد نے ڈھائی گھنٹے تک تشدد اور ہراسانی کا نشانہ بنایا تھا یہاں تک کہ اوباش نوجوانوں نے متاثرہ خاتون کے کپڑے بھی پھاڑ دئیے تھے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں