راولپنڈی: مقبوضہ جموں کشمیر میں مجاہدین اور بھارتی فوج کے درمیان ہونے والی جھڑپوں میں چار بھارتی فوجی ہلاک ہوگئے ہیں۔
پاک فوج کے شعبہ تعلقات عامہ آئی ایس پی آر کی جانب سے جاری بیان میں کہا گیا ہے کہ مجاہدین اور بھارتی فوج میں جھڑپ مقبوضہ وادی میں ہوئی، بھارتی فوج کا کپواڑہ میں مجاہدین سے سات اور آٹھ نومبرکی شب سامنا ہوا۔
آئی ایس پی آر کے مطابق مجاہدین اور بھارتی فوج کے درمیان ہونے والی جھڑپ میں چار بھارتی فوجی مارےگئے، اس واقعے کے بعد بھارتی فوج نے ایل او سی کے مختلف سیکٹرزپر شرانگیزیاں شروع کیں اور بھاری ہتھیاروں، مارٹرزگولوں کا بےدریغ استعمال کیا، ایل اوسی کےکئی سیکٹرز پر جان بوجھ کر شہری آبادی کونشانہ بنایا گیا، بھارتی فوج نے عالمی قوانین، انسانی حقوق کی خلاف ورزیاں کیں۔
آئی ایس پی آر کی جانب سے جاری بیان میں کہا گیا کہ بھارتی اشتعال انگیزیوں سے چار معصوم شہری شہید جبکہ بارہ زخمی ہوئے، پاک فوج نے بھارتی اشتعال انگیزیوں کا منہ توڑ جواب دیا، پاک فوج نے بھارتی چیک پوسٹوں کو موثرانداز میں نشانہ بنایا، پاک فوج کی جوابی کارروائی سے بھارتی فوج کو بھاری جانی نقصان اٹھانا پڑا، جبکہ پاک فوج کا ایک جوان بہادری سے لڑتاہوا شہید ہوا جبکہ پانچ زخمی ہوئے۔
یہ بھی پڑھیں: بھارت کیخلاف پاکستان کی فتح کو دنیا بھر میں تسلیم کیاگیا: ڈی جی آئی ایس پی آر
آئی ایس پی آر کی جانب سے جاری بیان میں کہا گیا کہ بھارتی فوج کو پہنچنے والا نقصان بھارتی میڈیا نےتسلیم کیا، پاکستان ایک امن پسند ریاست ہے، پاک فوج بھی خطےمیں امن چاہتی ہے، پاک فوج مادر وطن کا دفاع یقینی بنائےگی، کشمیری بھائیوں کی جان ومال کا تحفظ ہر صورت میں یقینی بنائیں گے اور بھارت کی ہر اشتعال انگیزی کا منہ توڑجواب دیا جائےگا۔
