کراچی میں بارشوں کے دوران کرنٹ لگنے اور چھتیں گرنے سے 2 بچوں سمیت 4 افراد جاں بحق ہوگئے ہیں، خاتون اور 2 بچے زخمی ہیں۔
شہر قائد میں بدھ کے روز بھی کہیں کہیں ہلکی اور تیز بارش ہوئی جب کہ آسمان پر بادلوں کی آنکھ مچولی بھی جاری رہی، بارشوں کے دوران کرنٹ لگنے اور چھتیں گرنے سے 4 افراد جاں بحق ہوگئے جن میں دو بچے بھی شامل ہیں۔
شہر قائد کی اعظم بستی میں گھر میں کرنٹ لگنے سے عمران نامی شخص جان کی بازی ہار گیا، قصبہ میانوالی کالونی میں بھی نوجوان عبداللہ کرنٹ لگنے سے جاں بحق ہوا، لانڈھی کے علاقے داؤد چالی میں 4 سالہ بچی بلقیس بجلی کے پول میں آنے والے کرنٹ سے موت کی نیند سوگئی جب کہ نارتھ کراچی میں گھر کی چھت گرنے کے نتیجے میں ایک بچہ جاں بحق اور دو بچوں سمیت خاتون زخمی ہوگئی۔
یہ بھی پڑھیں: شدید بارشیں، بلوچستان میں اموات کی تعداد 17 تک جاپہنچی
واضح رہے کہ بلوچستان میں گزشتہ روز طوفانی بارشوں کے دوران مختلف حادثات کے نتیجے میں 17 اموات ہوچکی ہیں جب کہ کوئٹہ کو آفت زدہ قرار دیدیا گیا ہے۔
