گوجرانوالہ : پنجاب میں شدید دھند کے باعث ٹریفک حادثات میں 4 افراد جاں بحق اور 37 افراد زخمی ہو گئے۔
تفصیلات کے مطابق پنجاب کی فضاؤں میں چھائی دھند زندگیاں نگلنےلگی ، گوجرانوالہ میں ڈی سی کالونی کے قریب مسافر بس الٹ گئی۔
بس سڑک پر پھسلن اور دھند کے باعث الٹی ، حادثے میں دو افراد جاں بحق پچیس زخمی ہو گئے، ریسکیو ذرائع نے بتایا کہ لاشوں اور زخمیوں کو اسپتال منتقل کر دیا گیا ہے، جہاں زخمیوں میں سے تین افراد کی حالت تشویشناک ہے اور بیس افراد معمولی زخمی ہیں۔
مسافر بس میں پچاس افراد سوار تھے اور مسافر بس کوہاٹ سے لاہور جا رہی تھی۔
دوسرے واقعے میں چیچہ وطنی روڈاڈاکلیرا کے قریب 4گاڑیاں آپس میں ٹکراگئیں،ٹریفک حادثے میں خاتون سمیت2افراد جاں بحق اور 12 زخمی ہوگئے۔
ریسکیوذرائع نے بتایا کہ دھند کے باعث بس، مزدا، ٹرک اور کار آپس میں ٹکرائے، حادثے کا شکار ایک گاڑی میں ڈرائیور پھنس گیا تاہم نکالنے کیلئے کوششیں جاری ہے۔
دوسری جانب حد نگاہ کم ہونے سے موٹروے کے مختلف سیکشنزآج بھی بند کردئے گئے جبکہ لاہور سیالکوٹ موٹروے پردھند کے باعث ٹریفک معطل ہے۔
موٹروےایم تھری فیض پور سے درخانہ تک ،ایم فور شور کوٹ سے فیصل آباد ،موٹروے ایم فائیو شیر شاہ سے ظاہر پیر تک دھند کی وجہ سے ٹریفک روک دی گئی۔